A DXT contabilizou dez falecidos en accidentes de tráfico neste 2019
OURENSE CIDADE
Sete sinistros mortais foron na estrada e tres en cidade. Houbo 79 feridos graves.
12 dic 2019 . Actualizado ás 05:00 h.Os representantes das distintas unidades da Administración xeral do Estado en Ourense fixeron balance das súas actuacións nos últimos meses nunha reunión que presidiu o subdelegado do Goberno, Emilio González Afonso. A xefatura provincial de tráfico da DXT achegou os datos de sinistralidade deste 2019: houbo dez falecidos -sete na estrada e tres na cidade- e 79 feridos graves. No capítulo de accidentes con fauna salvaxe, este ano computáronse 1.012 colisións, sobre todo con xabarís.
O centro penal de Pereiro de Aguiar foi outro dos organismos que debullou o máis importante realizado este ano, como programas de intervención sobre violencia de xénero ou de deshabituación a toxicomanías. Para o primeiro semestre de 2020, a prisión de Pereiro agarda que estea operativo o módulo de hospitalización do CHUO para asistir alí aos presos internados.
A unidade de estradas do Estado incidiu en que este ano se deu especial relevancia ás obras de reparación da N-120 debido aos desprendementos do 8 de novembro. A prioridade foi, segundo os responsables da unidade, salvagardar a seguridade dos traballadores e dos condutores. A circunvalación do Barco e os proxectos da A-76 (Ponferrada - Ourense) e do paso inferior de Ribela (Ourense) xa teñen a redacción avanzada.
A Confederación Hidrográfica Miño-Sil informou de que no segundo semestre de 2019 adxudicou actuacións por 1,9 millóns de euros. Ten en fase de redacción proxectos en Maceda, Bentraces, O Carballiño, Amoeiro e Esgos.
Unha nota positiva recibiuna o Muface de Ourense, pois en novembro foi distinguido como o servizo provincial que mellor funciona en toda España.
En canto ao emprego, o SEPE constatou un incremento (6,15 % máis) de expedientes tramitados; debeuse, afirman, ao aumento do subsidio para maiores de 52 anos.