O TSXG rexeita o recurso da Fiscalía de Ourense, que pedía unha condena máis alta, e tamén o da defensa
26 sep 2019 . Actualizado ás 08:32 h.O Tribunal Superior de Xustiza de Galicia confirmou a condena de nove meses de cárcere e a multa de 1.620 euros que a sección segunda da Audiencia Provincial de Ourense impuxo a un acusado vinculado ao movemento ecoloxista de Xinzo de Limia que en outubro de 2017, en plena onda de incendios en Galicia e con situación de risco extremo, prendeu lume nunha leira propiedade da súa muller situada nos Blancos.
O alto tribunal galego desestimou o recurso de apelación do Ministerio Fiscal contra o fallo emitido pola Audiencia ourensá, que condenou ao sospeitoso, Miguel Ángel M. N., como autor dun delito de incendio forestal por imprudencia grave. Naquela sentenza de primeira instancia destacábase que non se acreditou «que existise un grave perigo para a vida das persoas», tal e como sostén a Fiscalía. Esta circunstancia motivou unha substancial rebaixa da pena que pedía o ministerio público, que acadaba os cinco anos de prisión. Esta parte sostiña que o lume se rexistrou moi preto de vivendas.
Pero nin a sala ourensá nin agora o alto tribunal galego ven probada esta circunstancia, rexeitando así o recurso exposto pola fiscal de medio ambiente, encargada do caso, e ao que se adheriu a Xunta de Galicia. «Esa estimación será máis ou menos discutible pero está lonxe de ser ilóxica ou irracional ou operar no baleiro ás costas da proba», recolle o fallo, no que se dan por bos os primeiros argumentos e, xa que logo, confírmase a sentenza. Os togados do tribunal superior tamén rexeitaron o recurso que presentou a defensa do imputado, que solicitaba a imposición dunha pena mínima, un feito ao que tamén se opoñen os togados encargados de estudar este asunto.
O incendio tivo lugar nos Blancos e calcinou 1,2 hectáreas de terreo. No xuízo o acusado alegou que se produciu cando se dispuña a «asar chourizos».