O home que se lanzou ao Miño desde unha ponte de Ourense acabábase de escapar do hospital
OURENSE CIDADE
Os feitos ocorreron ao mediodía de hoxe e foron numerosas as persoas que o viron
25 jun 2019 . Actualizado ás 19:25 h.Un home duns trinta anos de idade lanzouse ao mediodía desde a Ponte Nova de Ourense cara ao río Miño, ante a presenza de numerosas persoas que a esa hora paseaban por unha zona moi concorrida, tanto por viandante como por condutores. A Policía Local de Ourense recibiu ás 13.45 horas o aviso dunha muller que explicaba que buscaba ao seu fillo, de 30 anos, porque se escapou do CHUO, manifestado a súa intención de suicidarse. Estableceuse un dispositivo de procura e aos poucos minutos recibiron un aviso no que se alertaba da presenza do mozo nunha das varandas da Ponte Nova, na beirarrúa dereita en sentido centro cidade. Cortouse o tráfico e axentes da policía nacional e local intentaron persuadilo, tratando de non achegarse moito, por indicacións do propio novo, que finalmente logrou descolgarse da varanda precipitándose ao río Miño. Saíu á boia e nadou con dificultade cara á beira, onde axentes de policía local e nacional conseguiron sacalo da auga.
Ao descoñecer o alcance das lesións e dado o escarpado do terreo, mentres era atendido polos axentes, solicitouse a presenza dos bombeiros da capital para rescatalo con seguridade da beira, do mesmo xeito que se deu aviso a unha ambulancia, que o trasladou ao CHUO consciente.