Cruyff xogou no estadio José Antonio da capital
26 may 2019 . Actualizado ás 10:00 h.A cidade de Ourense tiña en 1973 cincos cines, celebraba a segunda edición das Xornadas do Cine e unha nova ponte sobre o Miño unía Ribadavia coa Arnoia.
deportes
Ascenso do C. D. Ourense e visita de Cruyff. La Voz contaba o 19 de maio de 1973: Todo está preparado para que os seareiros do C. D. Ourense celebren o ascenso do equipo a Segunda División. Precisamente nos preliminares do encontro desta noite haberá desfile das diferentes seccións da sociedade, así como dos grupos de coros e danzas da Sección Feminina, gaiteiros e bandas de música. Soltáronse 10.000 globos e os nenos menores de 14 anos entrarán gratis». O 20 de outubro o Barcelona visitou Ourense para disputar un partido amigable, ao que acudiu Johan Cruyff.
infraestruturas
Nova ponte sobre o Miño entre Ribadavia e A Arnoia. O 22 de xullo de 1973, La Voz informaba: «Unha nova ponte sobre o Miño acaba de ser inaugurado polo gobernador civil, señor Regalado Aznar, -e outras autoridades provinciais- que une os concellos de Ribadavia e Arnoya. A nova ponte está formada por dúas bóvedas xemelgas de formigón armado de 56 metros de luz e 14 de frecha. Ten unha anchura total de 5,40 metros. A obra importou 9.760.568 pesetas».
Sucesos
Compra e venda dunha pila bautismal. Unha chamada de Xesús Ferro Couselo a La Voz, en 1973 era conselleiro provincial de Belas Artes, informou de que a vila de Freás fora escenario dun feito excepcional: Os seus habitantes manifestáronse masivamente contra o cura, cando intentaba facer entrega, supúñase que por compra-venda, dunha pila bautismal de pedra a uns xitanos».
Encoro
Un pobo baixo as augas. Cun total de trescentos veciños, Veigas de Camba estaba chamado a desaparecer baixo as augas do encoro de Portas. En 1973, os veciños conseguían que se valorasen mellor os terreos.