Gerson Iglesias (Adega de Caldas): «Hai que darlle voltas á cabeza para tratar de ser orixinal»
OURENSE CIDADE
Tras unha dilatada traxectoria en restaurantes de prestixio de Vigo , Gerson Iglesias Fernández (Ourense, 1981), regresou ás súas orixes, á súa terra natal, para tomar as rendas do Adega de Caldas, en Ourense, un local que levaba aberto case medio século onde a cociña tradicional era o seu aceno de identidade: «Temos que xogar un pouco coa base tradicional e coa cociña máis contemporánea, máis elaborada. Un equilibrio entre as dúas cociñas», asegura este cociñeiro ao que lle funciona tanto o arroz con bogavante como «o noso polvo á grella con aceite de granada e limón». Cambia cada tres ou catro meses de carta e gústalle tamén dedicar un pouco de tempo a innovar: «Cada día lle dedico un pouco de tempo, polo menos mentalmente, despois elaboralo todos os días é complicado, pero todo o que sexa innovación non se pode deixar morrer. Hai que estar constantemente dándolle voltas á cabeza para tratar de ser orixinal e, sobre todo, que lle guste a xente», asegura.
Gerson é dos que recoñece que en Galicia se están facendo as cousas ben: «Estamos nunha terna no que a cociña tradicional está moi arraigada e a máis contemporánea tocou cima. Penso que agora estamos volvendo un pouco as elaboracións máis tradicionais, pero con técnicas máis modernas. Dándolle unha voltiña neste sentido», indica.
En canto ao nomeamento a cociñeiro revelación recoñece que nunca chegou a pensar que podía estar entre os elixidos: «Si que me sorprendeu, aínda que un segue loitando e traballando con toda a ilusión do mundo, estar nominado é algo moi complicado. Soñas con estar aí algún día, pero sabes que é moi difícil porque somos moitísima xente que agora está facendo ben as cousas en Galicia. A verdade é que non o agardaba, quedeime un minuto parado intentando asimilalo», confesa este cociñeiro que asegura que se sente gañador ao ver recompensado o seu esforzo.