Os integrantes da banda, dominicanos, apoderáronse dun botín superior aos 70.000 euros en menos de tres meses
18 dic 2019 . Actualizado ás 05:00 h.Durante os meses de decembro do 2015 e marzo do 2016 a presenza dunha banda especializada en asaltar vivendas puxo en alerta ás forzas de seguridade. Propietarios de vivendas situadas en Pereiro de Aguiar, Bande, Porqueira, O Carballiño, Nogueira de Ramuín ou San Cibrao das Viñas denunciaron ter sido vítimas de asaltos nas súas vivendas por parte de descoñecidos que, na maior parte dos casos, buscaban diñeiro e xoias. Rexistráronse ata vinte e dous asaltos en pouco máis de tres meses e, tras semanas de investigación, finalmente logrouse capturar a sete sospeitosos que esta semana están a ser xulgados na capital ourensá.
Trátase de Joel M. F., Víctor P. M., Gregorio R. L., Kelly A. C., Yesenia C. L., Angelica A. G. e Clairy M. G. A Fiscalía de Ourense acúsaos de integrar unha banda «constituída co fin de atentar contra a propiedade allea», sostendo que varios deles se dedicaban a asaltar a vivendas, en todos os casos en momentos nos que o seu propietarios non se atopaban dentro, mentres que o resto se ocupaba de vender as xoias ou obxectos de valor incautados, co fin de lograr diñeiro en efectivo.
Así as cousas impútalles un delito de integración en grupo criminal, outro continuado de roubo en casa habitada, outro de receptación e outro máis de utilización de documento de identidade falso, polos que reclama penas de prisión que van desde os oito meses de cárcere ata os seis anos de reclusión.
Segundo a acusación todos os asaltos se rexistraron entre os meses de decembro do 2015 e marzo do 2016, logrando nalgúns casos fortes sumas de diñeiro e xoias valiosas, superando o botín os 70.000 euros. Constatouse tamén a gran actividade do grupo, xa que nunha soa xornada haberían chegado a cometer dúas e mesmo tres roubos en vivendas.
Tras dous días de vistas o xuízo chega ao seu fin este mércores coa presentación de conclusións finais. Todos os implicados negaron a súa participación nos feitos delituosos.