O mercado, que pretende fomentar o consumo local, celebra a súa primeira cita esta fin de semana en Lugo
31 jul 2021 . Actualizado ás 05:00 h.Mel, embutidos, licores, doces, pasta... pero tamén viños ou cervexa artesanal, entre moitos outros, elaborados por produtores do interior ourensán e do norte de Portugal. Todos eles son os protagonistas da feira de artigos tradicionais que organiza o Eixo Atlántico, xunto ao Concello do Barco. «Parécenos unha oportunidade moi interesante tanto para o consumidor, a quen cada vez lle interesa máis a materia local e de proximidade, como para os produtores, que atopan nesta feira un punto de encontro para coñecerse entre eles e compartir experiencias», explica Eladio Santos, concelleiro de Promoción Económica do municipio barquense. Despois de máis dun ano de parón pola pandemia, volveron a pór en marcha a celebración destas feiras. Comezan esta fin de semana en Lugo e en setembro tocaralle ao Barco.
A praza Horta do Seminario da capital lucense acolle ata o domingo o mercado, no que participan 14 produtores de Galicia e Portugal. Cinco deles pertencen á comarca de Valdeorras. «A maioría son produtos ecolóxicos e de proximidade», apunta Santos. O concelleiro participou este venres na inauguración da feira xunto á alcaldesa de Lugo, Lara Méndez, e a o secretario xeral do Eixo Atlántico, Xoán Vázquez Mao.
A cita chegará ao Barco en setembro. «Fixemos unha no 2019 e tiñamos outra preparada para o 15 de marzo do 2020, pero xusto antes apareceu a pandemia», lembra o concelleiro de Promoción Económica do municipio. Os postos, que aínda están por confirmar, distribuiranse polo paseo do Malecón barquense. Será ao aire libre e mantendo un estrito protocolo de seguridade fronte ao covid. Aínda non hai data pechada pero Santos afirma que coincidirá coas Festas do Cristo, cuxo día grande é o 14 de setembro. «É unha iniciativa moi interesante porque axuda á comercialización e á difusión dos pequenos produtores», remata Santos.
