A primeira xornada do Túnel do Viño pecharase co concerto de Broken Peach
10 jul 2021 . Actualizado ás 09:22 h.O ano pasado non puido ser, e este ano tampouco haberá Feira do Viño de Valdeorras ao uso, pero desde a denominación de orixe han reformulado a cita para presumir de viños ante os de casa (ou os que estean de visita). A praza Otero Pedrayo de Viloira no Barco acollerá hoxe e mañá un Túnel do Viño. Non haberá casetas, senón unha gran carpa á que poderán acceder algo máis de 100 persoas ao mesmo tempo para ir percorrendo os diferentes postos e probar as ao redor de 70 referencias que presenta 22 adegas amparadas polo selo de calidade.
Para acceder ao recinto hai que pagar unha entrada de 7 euros, coa que se obtén tamén o catavinos no que os camareiros servirán todos os viños que a persoa queira, nun máximo de 45 minutos. Existe a posibilidade de comprar unha entrada para dous pases ao prezo reducido de 10 euros. O horario do túnel é de 12.00 a 14.00 e de 17.00 a 22.00 horas, hoxe e mañá. Hoxe, a clausúraa, na mesma praza está previsto o concerto do grupo vigués Broken Peach.
Ademais, á unha e ás seis haberá catas comentadas. A sesión matutina será sobre viño e froita, e a segunda sobre queixo e viño. Hai un máximo de 20 prazas para cada unha, e debe facerse reserva previa.
O túnel comeza tras a cea celebrada onte á noite para a entrega dos premios da cata. Participou o conselleiro de Medio Rural, José González, que avanzou que a Xunta estuda repetir este ano a liña de crédito á vendima se é preciso para paliar os efectos da pandemia.
