Ocultaron droga no coche e pilláronos ao deixalo mal aparcado no centro urbano do Barco

Ocultaron a droga dentro dun coche, e a pesar de que pensaron que ninguén podería descubrila, deixaron o coche mal estacionado na vía pública do Barco e ese foi o seu gran erro. O incidente ocorreu na tarde do pasado martes no centro urbano desa localidade, onde os axentes de Policía Local que se atopaban patrullando pola zona decatáronse da presenza dun vehículo que se atopaba aparcado nunha zona indebida. Os funcionarios municipais non tardaron en localizar tanto ao condutor como ao ocupante do automóbil e requiríronlles para que o movesen.

Pero lonxe de facelo, os sospeitosos aseguraron que non tiñan nese momento as chaves, mostrando unha actitude nerviosa ante os axentes que lles fixo sospeitar. Decidiuse entón avisar ao guindastre para que retirase o turismo da vía pública, acordándose o seu traslado ao exterior de cuartel da Garda Civil, onde quedou custodiado á espera de que o pai dun dos sospeitosos acudise coas chaves e puidese recollelo. Pero antes de que pasase iso, apenas unha hora despois de que o vehículo chegase ás dependencias oficiais, presentáronse alí os dous homes, quen usando as chaves do coche que antes dixeran non ter, abrírono e sacaron do interior un paquete, para logo saír correndo a fume de carozo.

Pero os axentes do instituto armado estaban a agardalos e antes de que puidesen escapar, localizáronos. O paquete que tanto interese mostraran en ocultar resultou conter 160 gramos de marihuana, unha cantidade elevada que fai sospeitar que podería estar destinada á venda a terceiros. Así as cousas, remataron sendo arrestados A. F. G., de 21 anos, e M. H. D., de 30, como presuntos autores dun delito contra a saúde pública. Ambos son veciños do Barco e na mañá de onte compareceron no xulgado de garda desa localidade, que os puxo en liberdade á espera de que avancen as dilixencias do caso.

---

---

---