Baixan os casos activos nos centros escolares por primeira vez desde a volta ao cole
O Barco de Valdeorras
Consulta a lista das escolas infantís, colexios e institutos afectados
16 oct 2020 . Actualizado ás 19:07 h.Por primeira vez desde o inicio do curso escolar, hoxe baixa o número de casos activos nos centros educativos. Onte a cifra de contagios nas escolas infantís, colexios, institutos e centros de FP era de 184. Hoxe son 181. Débese a que nas últimas horas producíronse varias altas. Pero non todo son boas noticias, tamén hai casos novos. De feito, o virus hase coado en tres centros da provincia que ata o momento estaba libres de covid-19. Trátase do CPI Terras de Maside, o CPR Vila do Arenteiro do Carballiño, cun caso en cada un; e no CEIP Virxe de Covadonga de Ourense, con tres contagios.
Tamén hai centros que saen da listaxe, tras ter recibido a alta os casos positivos que había. Nesa situación están o CEIP de Quins en Melón, o CEIP Julio Gurriarán e o IES Lauro Olmo do Barco de Valdeorras, o CEIP Inmaculada de Ourense, o CEIP Rogelio García Yáñez de Ramirás e o CEIP Saco e Arce de Toén.
En total son 79 os centros escolares con casos activos, repartidos por todo o territorio provincial. Baixan nos colexios, pero non no contexto xeral. Hoxe Ourense volve pasar dos 1.600 casos activos tras un repunte de contagios.