O hospital do Barco cancelas as operacións non urxentes por falta de cirurxiáns
O Barco de Valdeorras
As gardas son cubertas por especialistas que veñen desde Ourense
01 novs 2019 . Actualizado ás 14:53 h.Un cirurxián con redución de xornada é todo o persoal que agora mesmo ten o departamento de cirurxía no Hospital Comarcal de Valdeorras (o outro facultativo está de baixa), así que se cancelaron todas as operacións programadas. Mantéñense os quirófanos abertos para urxencias -que se cobren con médicos que veñen desde Ourense-, e as programadas que non poden agardar están a derivarse á capital. As demais, como pode ser unha operación de juanetes, están a aprazarse. De momento sen data, porque non se sabe cando se recuperará a normalidade no Hospital comarcal de Valdeorras, segundo explican desde a EOXI. «Pódese dicir que os quirófanos están pechados», explicaban onte desde a comisión de centro do hospital. O portavoz dos traballadores, Suso Vilasánchez (CIG), denunciaba que a situación é cada vez peor e chamaba aos afectados a presentar queixas por escrito. «Facemos un chamamento para que a xente acuda a atención ao paciente e poña unha queixa; porque non lle vai supoñer unha solución no momento, pero na EOXI terán que poñerlle solución no futuro», destacaba Vilasánchez.
Hospitalización a domicilio só no val
Os representantes dos traballadores tamén denunciaron que o servizo de hospitalización a domicilio (que se coñece como ADO) só está a funcionar no a zona do val, entre Carballeda de Valdeorras e Petín; pero que non dá servizo ao resto do distrito, que abarcaría ata Viana do Bolo e A Pobra de Trives. «Venderon que era para todo o distrito, pero é imposible cun facultativo e unha enfermeira» dicía Vilasánchez. Desde a EOXI explicaron que se ampliará en breve.