Alfredo García non asistirá o pleno que o reprobará de novo na Deputación
O Barco de Valdeorras
«Teño cousas máis importantes que facer», asegura o alcalde do Barco
12 dic 2018 . Actualizado ás 16:30 h.O anuncio por parte do Partido Popular de que levará de novo ao pleno da Deputación a reprobación do presidente da Fegamp, Alfredo García, trae sen demasiado interese ao tamén rexedor do Barco. De feito, e ao contrario do que ocorreu a primeira vez, non ten previsto asistir á sesión plenaria. «Eu teño cousas máis importantes que facer», dixo, e xa cada un que interprete a mensaxe como queira, dándose por aludido ou non segundo criterio propio. Aseguraba que está moi ocupado. «Eu teño que traballar polo meu pobo, e mesmo por todos os concellos galegos; e non estou para chirigotas», engadía. Cabe lembrar que a reprobación do PP a Alfredo García débese a que o rexedor barquense reclamou unha repartición xusta de fondos por parte da Deputación a todos os concellos da provincia, como xa se fai nas outras tres provincias galegas (nas que non goberna o PP); cuestión que desde as filas populares entenderon como unha inxerencia.
García non parecía disposto a gastar moito tempo no tema. «Paso olímpicamente diso, e non lle dou a máis mínima importancia», dicía. E resolvía: «non hai maior desprezo que non facer aprecio, e a iso vou».
Relacionado con este asunto, o xulgado dirime se Baltar se saltou a lei ao reprobar a García, por haber cambio a orde do día do pleno da Deputación.