O Concello de Quiroga invita á comarca de Valdeorras a reclamar o arranxo da N-120
O Barco de Valdeorras
O concello pide a Fomento que mellore o firme
10 novs 2018 . Actualizado ás 13:45 h.O grupo de goberno do Concello lucense de Quiroga, do Partido Popular, presentou unha moción na que propón que a corporación solicite ao Ministerio de Fomento o acondicionamento do firme da estrada N-120 ao seu paso polos municipios do sur lucense e da comarca ourensá de Valdeorras. A proposta sinala o «mal estado que presenta o firme» deste viario entre O Barco e Pantón, dicindo «que presenta gran cantidade de gretas e fochancas que fan perigar a circulación». Así mesmo, apunta que nas últimas semanas rexistráronse varios accidentes nesta estrada.
A moción lembra que a alcaldía de Quiroga se dirixiu o pasado maio á demarcación lucense das estradas do Estado para denunciar o mal estado da N-120. O grupo de goberno propón doutra banda enviar unha copia do acordo aos concellos de Monforte, A Pobra do Brollón, Pantón, O Barco, Vilamartín e A Rúa.
O perigo da N-120 ao seu paso polo sur lucense fíxose patente entre o 30 outubro e o 5 deste mes. Durante ese período rexistráronse catro accidentes no tramo coñecido como as curvas de Abrence, no municipio da Pobra do Brollón. Un destes sucesos saldouse cunha muller ferida de gravidade.
Doutra banda, un derrumbe de pedras que afectou á estrada nacional 120, na localidade ourensá de Velle, obrigou o xoves pola noite a cortar completamente o carril en sentido Monforte. Varias patrullas de Tráfico desprazáronse ata o lugar para sinalizar a incidencia e derivar o tráfico polo carril libre. Dous vehículos sufriron danos nas rodas polos desprendementos, pero non se rexistraron feridos.