A comarca abandeira a incorporación de traballadores ao mercado laboral
14 jul 2019 . Actualizado ás 05:00 h.Outrora foi terra de poetas. Pero en Celanova xa non corren tan bos tempos para a lírica e, por exemplo, si para a tecnoloxía, un dos exemplos que ilustra a boa dinámica recente da comarca na creación de emprego . Os datos que manexa a Consellería de Economía, Emprego e Industria outorgan a esta zona a porcentaxe máis elevada da provincia neste ámbito, un 2,50 % no primeiro trimestre do 2019. A efectos prácticos, é máis do dobre da cidade de Ourense.
A Seguridade Social contabilizou neste período un total de 4.888 traballadores en Celanova , 119 máis que en mesmo tramo do ano anterior. Segue habendo unha dependencia clara do sector servizos, que concentra ao 69 % do persoal empregado na comarca, pero a industria elevou a súa presenza no tecido local a máis dun 15 %, unha cifra superior á que presenta a nivel autonómico e que, en certo xeito, garda un vínculo co desenvolvemento do Coworking de Celanova-Baixa Limia que a comezos de xullo celebrou a súa cuarta edición. Deste proxecto, iniciado no 2016, puxéronse en marcha 45 dos 82 plans de emprendimiento avaliados, o que deu paso á creación de 69 empregos.
Oportunidades na corentena
Ao contrario do que podería parecer, unha das franxas de idade que rexistra a inserción máis destacada no mercado laboral é a que supera os 44 anos. Dos veciños da comarca que se afiliaron neste trimestre, 86 sitúanse ou superan dita idade. Curiosamente, tamén se palpa este fenómeno nos mozos menores de 30 anos, con 47 afiliacións máis.
Un total de 17 proxectos reciben formación, axudas e asesoramento para o seu desenvolvemento
As empresas que florecen no coworking de Celanova penétranse en ámbitos moi diversos e, ás veces, complementarios. Varios dos proxectos empresariais que arrincaron alí a súa andaina fixérono apostando polo sector da moda, a posta á venda de artigos relacionados coa valorización dos recursos territoriais, o turismo provincial ou a oferta de produtos agroalimentarios, pero tamén do aproveitamento dos servizos tecnolóxicos, caso da empresa Escolabs, unha iniciativa enfocada á formación nas áreas científicas, matemáticas e de programación na que varios dos módulos educativos exploran as posibilidades que ofrecen a robótica e a impresión en 3D. No caso de Telmo, un dos talleres baséase nun curso de pilotaxe de drones de competición, que el mesmo imparte en colaboración con eles.
Deste cuarto empuxón valórase que se poderían crear en Celanova ao redor de 15 postos de traballo relacionados con estas iniciativas de aceleración, que reciben formación e asesoramento para o seu desenvolvemento. Son un total de 17 proxectos que dan continuidade a un programa fomentado pola Consellería de Economía, Emprego e Industria a través do Igape, e a Escola de Organización Industrial (EOI).
Non é unha iniciativa lanzada unicamente a nivel provincial, senón que tamén estendeu a súa influencia a toda Galicia, onde chegou ata 700 persoas de espírito emprendedor e a un total de 641 proxectos a escala autonómica. Desde a Xunta, e por medio dos programas Galicia Emprende e Galicia Rural Emprende , ofreceron a través das súas últimas convocatorias axudas por valor de nove millóns de euros para potenciar os proxectos de 200 autónomos.
O coworking local aluma a continuidade de empresas familiares e o uso de drones
A Víctor Montero, veciño de Celanova de 33 anos, preocupáballe o que vía cando os seus amigos volvían do estranxeiro: «Eles ían e viñan, dando voltas por fóra. A min dábame apuro irme, porque estou cómodo e non me falta de nada, así que decidín aprender a levar a empresa do meu pai». Así foi como, case sen darse conta, atopouse dirixindo a fontanería que o seu proxenitor levaba ata que decidiu xubilarse. E na segunda edición do coworking de Celanova atopou varias pistas sobre como organizarse. «Quería saber que podía facer ante de que el se fose. Por exemplo, crear unha páxina web, as tarefas administrativas ou facer as facturas», conta.
Agora, Víctor traballa con outro empregado que leva varios anos con el. O reto agora pasa por ir máis aló do ámbito comarcal. «No coworking danche vías para que poidas publicitarche mellor e chegues a outros contratistas», di.
Os drones e o seu uso nos montes
Telmo López chancea cando conta que aínda lle queda un pouco para finalizar a carreira universitaria de enxeñeiro civil. Pero as súas miras están tan postas niso que xa traballa cunha empresa de drones para aproveitar o seu potencial á hora de empregalos en tarefas de topografía ou inspección de terreos. Para el tratábase hai anos dunha afección máis, pero os camiños profesionais leváronlle precisamente aí, a gozar de sobrevoar o territorio galego cando contactou no 2015 con outros socios enfocados a negocios tecnolóxicos e asentados no coworking de Celanova. Agora, perfila dous nichos de negocio: o primeiro, traballos de I+D+i e identificación de especies na contorna forestal; e doutra banda, proxectos de información xeográfica sobre a superficie.
E aí aflora unha pregunta inevitable: se o seu traballo podería axudar a limitar o impacto dos incendios ou mesmo a axudar nas tarefas de extinción ás forzas de seguridade. E si, é un dos horizontes que Telmo contempla no curto prazo. «O coworking serviunos para entender esa parte algo máis empresarial que nos falta a moitos enxeñeiros, que adoitamos centrarnos na precisión do noso traballo e non tanto no comercial», di.