A curva na área sanitaria segue en baixada: hai 280 ourensáns contaxiados
03 mares 2021 . Actualizado ás 05:00 h.A cidade de Ourense tiña o luns 97 casos activos. Onte a cifra subía a 98. Non é un salto moi importante, pero si supón un cambio na tendencia, porque despois de 29 días de baixada continua, o martes a cidade amenceu con máis positivos dos que tiña 24 horas antes.
O Concello de Ourense fixo teito o pasado 1 de febreiro. Ese día había 1.023 veciños contaxiados, o que supuxo a cifra máis alta en toda a pandemia. Desde entón, a evolución fora a de que cada xornada había máis altas que novos contagios, así que a curva sinalaba baixada. Ata este martes 2 de marzo. Dos 98 casos activos actualmente, 73 contaxiáronse nos últimos 14 días; e 33 na última semana. Significa que a capital provincial está en risco medio (segundo o baremo acordado polo Consello Interterritorial do Sistema Nacional de Saúde o pasado mes de outubro), ao ter unha incidencia acumulada a 14 días de entre 50 e 150 casos por 100.000 habitantes.
Fóra da capital, O Barco de Valdeorras é o concello con maior número de casos activos, un total de 12, tamén en risco medio. O terceiro posto é para Maceda, con 10 veciños pasando o covid, o que o sitúa en risco extremo, cunha incidencia de entre 250 e 500 casos. No resto da provincia, ningún concello ten máis dunha decena de veciños contaxiados. E en 43 municipios non hai ningún caso activo. Trátase de Baños de Molgas, Beariz, Os Blancos, A Bola, O Bolo, Calvos de Randín, Carballeda de Avia, Castrelo do Val, Castrelo de Miño, Chandrexa de Queixa, Entrimo, Esgos, O Irixo, Larouco, Lobeira, Manzaneda, Melón, Montederramo, Monterrei, Muíños, Nogueira de Ramuín, Padrenda, Parada de Sil, Petín, Piñor, Porqueira, Pontedeva, Quintela de Leirado, Rairiz de Veiga, Ramirás, San Xoán de Río, Rubiá, San Amaro, San Cristovo de Cea, Sarreaus, A Teixeira, A Veiga, Vilamarín, Vilamartín de Valdeorras, Vilar de Barrio, Vilar de Santos, Vilardevós e Vilariño de Conso.
Máis dun mes coa curva en baixada na provincia
En total, hai 280 ourensáns positivos en covid actualmente, o que supón un día máis de caída da curva, e xa van 32 desde que o pasado 29 de xaneiro fixésese teito. Ese día había 2.989 ourensáns contaxiados, cifra que ha ir caendo a diario. As altas son sempre máis que os novos casos detectados. No último balance recóllese que 7 ourensáns deron positivo entre o luns e o martes, mentres que outros 17 recibiron a alta.
Dos casos activos, a maioría dos pacientes están en illamento domiciliario, aínda que 38 precisan asistencia hospitalaria. Hai 35 persoas en planta: 30 no CHUO e 5 no hospital comarcal de Verín; e outros tres na unidade de críticos. O hospital comarcal de Valdeorras leva varios días sen pacientes covid.
Cribado na Gudiña
Aínda quedan dous casos activos na Gudiña. A semana pasada eran 8 os veciños contaxiados, ante o que o Sergas convocou un cribado masivo para esta tarde (de 15.30 a 19.00 horas) no pavillón. Están citadas 500 persoas de entre 18 e 75 anos.
Outros 400 veciños da Mezquita -localidade onde hai 8 casos activos- están convocados no mesmo horario no pavillón da localidade.
Con estas probas, o Sergas busca detectar posibles positivos asintomáticos que estean a contaxiar ao non saber que teñen coronavirus.
Un caso en residencias
No que afecta as residencias de maiores, actualmente hai un único caso activo en toda a provincia de Ourense. Trátase dun usuario da residencia da Fundación Valdegodos en Viana do Bolo.