A Confederación impón unha multa de 50.000 euros ao ADIF por tirar os vagóns ao río Sil
CARBALLEDA DE VALDEORRAS
O administrador de infraestruturas ferroviarias ten posibilidade de alegar
14 ago 2020 . Actualizado ás 17:46 h.Cincuenta mil euros. Esa é a cantidade na que cifra a Confederación Hidrográfica Miño-Sil a multa que ten que pagar o ADIF por ter precipitado dous vagóns dun tren ladeira abaixo, acabando un deles no río Sil ao seu paso por Sobradelo (en Carballeda de Valdeorras). Doce días despois do que o presidente do organismo da conca, José Antonio Quiroga, cualificou como «incidente desafortunado», pechouse o expediente aberto sobre o caso e a resolución marca esa multa. Pero aínda non é definitiva a cantidade, xa que agora se abre o período para que o ADIF poida presentar alegacións.
Mentres, na zona continúan os traballos para repor a ladeira, o que conforma a segunda parte dos traballos de ADIF para reverter a situación. A primeira parte consistiu na retirada dos vagóns, traballos que quedaron rematados o pasado luns. Xa o mércores, recuperouse o tráfico ferroviario en Valdeorras, cortado desde que o pasado día 28 de xullo descarrilase un tren de mercancías. Durante ese tempo, os viaxeiros eran trasladados en autobús entre A Rúa de Valdeorras e Ponferrada.
É a segunda multa que o administrador de infraestruturas ferroviarias ten que afrontar por ter tirado dous vagóns ao Sil. Xa a semana pasada, a conselleira de Medio Ambiente, Ángeles Vázquez, anunciou que a Xunta impuxo unha sanción económica de 35.000 euros ao ADIF por verter residuos ao río. Aínda está pendente de pechar outra investigación do mesmo departamento sobre a posible afectación do sucedido á canle fluvial. E tamén a Fiscalía de Ourense abriu unha investigación de oficio para determinar se houbo un posible delito ambiental.