O Barco e Barbadás xa gozan da iluminación, que hoxe iluminará Ourense e Maceda; Celanova abre a súa pista de xeo
05 dic 2019 . Actualizado ás 05:00 h.O Nadal xa está aquí. Cada vez máis preto, o aceso das luces marca o inicio da programación nos concellos da provincia. Onte á noite o momento de apertar o botón da iluminación reuniu por centos de persoas na Valenzá (Barbadás), mentres que no Barco seguiron apostando por un aceso tradicional, isto é, ás oito ilumináronse as luces e xa. Sen acto multitudinario polo medio. Era o inicio do programa de actividades que presentou a edila de Cultura, Margarida Pizcueta, que destacou que se trata dun cartel dirixido especialmente aos nenos, por ser os protagonistas indiscutibles destas festas. O día 17 será o festival de panxoliñas na igrexa de Santa Rita (19.30 horas), mentres que o 18 haberá o de Nadal do conservatorio no teatro, e o 20 o do Orfeón e a Banda en Santa Rita. O 21 ás 19.00 horas haberá unha nova edición da carreira do turrón. O día 26 haberá teatro, e o 27 maxia. O 28 haberá teatro de novo, nunha representación de Gargallada para conmemorar a caída da ponte de San Fernando, da que se cumpren 60 anos. Recuperarase a exposición realizada hai unha década para conmemorar a efeméride. Será ás 20.00 horas no Teatro Lauro Olmo. Ademais, durante as festas haberá pista de xeo (do 23 ao 29 na praza do Concello), inchables (no pavillón de Calabagueiros, do 1 ao 7) e cine (do 20 ao 7).
Celanova
Ás 19.00 horas, Celanova abre na súa praza Maior a pista de xeo natural, que estará aberta ata o 7 de xaneiro. É unha iniciativa da asociación de comerciantes Celanova CHEA, que se complementará con outras actividades como concertos, catas ou talleres. Na inauguración de hoxe actuará un grupo de nenas da escola municipal de patinaxe artística e haberá unha proxección con luces de láser sobre a fachada do mosteiro. O aceso das luces por parte do Concello está anunciado para o día 14.
Maceda
En Maceda, hoxe ás 18.30 horas, estrean a megafonía e iluminación do Nadal, ademais da vila de Nadal. Será na praza Benigno Álvarez cun concerto de panxoliñas.
Ourense
Na cidade fíxose agardar este ano o aceso da iluminación do Nadal, sobre todo con respecto a municipios como o de Vigo. A cita é esta tarde: será ás 20.00 horas na Praza Maior de Ourense e contarase coa actuación da coral Encaixe.
O Carballiño
Na vila do Arenteiro desenvolverán un amplo programa de actividades do Nadal, desde o venres ao 24 de xaneiro. E procedeuse a abrir o concurso de escaparates do Nadal. O prazo para inscribirse finaliza o día 20, ás 13.00 horas. Concederanse tres premios aos mellores escaparates: de 200, 150 e 100 euros. O xurado valorará os escaparates a concurso os días 21 e 22.
O Pereiro
O Concello do Pereiro de Aguiar organizou un amplo programa de actividades para estas datas. Entre outras iniciativas haberá recollida solidaria de alimentos, visita a Pazolandia, concerto da coral Terras de Aguiar, concurso de cartóns do Nadal e outras iniciativas.
Barbadás
No municipio limítrofe á cidade deron o pistoletazo de saída á súa programación este mércores. Na Avenida de Celanova procedeuse ao simbólico aceso das luces do Nadal. O labor correu a cargo dos que máis gozan destas festas, os nenos, e contouse con animación e actividades para a ocasión.