As escavacións do castro de Acea entre Baños e Xunqueira deixa ao descuberto un canastro castrexo de gran valor
23 may 2018 . Actualizado ás 05:00 h.Baños de Molgas e Xunqueira de Ambía comparten o castro de Acea. É un enclave histórico localizado hai tempo que agora decidiron pór en valor e convertelo nun reclamo turístico para ambos os municipios. Así que co inicio de maio comezou a primeira escavación da zona, e en apenas 20 días, xa hai resultados que sinalan a importancia do lugar. Así o resaltaron os rexedores, Xaime Óscar Iglesias e José Luis Gavilanes, que onte visitaron o xacemento. Fixérono xunto ao equipo de arqueólogos, composto por catro profesionais que traballan co apoio de dúas brigadas municipais (unha por concello). E foron os expertos os encargados de resaltar a importancia da escavación. «No que temos aberto temos dúas edificacións, varios muros de estruturas castrexas e, o máis singular, un canastro. É o achado máis senlleiro porque non hai ningún na provincia de Ourense, e en toda Galicia só se localizou un no castro de Astariz, no Saviñao; é un dos primeiros canastros do país», apuntaba o arqueólogo David Pérez.
«Agora xa se ve, e vaise consolidar para que quede á vista -engadía-. Ten oito ventaíñas polo fondo para que entre o aire, e despois un estrado de madeira onte meterían o cereal». Aínda a falta de datar claramente, «non ten indicios de romanización, así que sería do século tres ou catro antes de Cristo», dicía Pérez. É un dos elementos singulares dun castro no que os expertos calculan que viviron ao redor dun milleiro de persoas.
Unha ruta de sendeirismo
Aínda quedan varias semanas de labor por diante, co obxectivo de documentar todo o atopado e consolidar os muros das edificacións para evitar que veñan abaixo. Ademais, os traballos inclúen a sinalización do castro, ata o que se chega seguindo unha nova ruta de sendeirismo.
«Abriuse o camiño e completouse con paneis explicativos, para que os visitantes poidan saber o que van vendo», explicaba Pérez. Só falta o panel da escavación, á espera de rexistrar todo o que se atopou. No verán os turistas poderán chegar ata o castro e gozar do xacemento con todas as explicacións ao seu alcance.
O obxectivo de ambos os gobernos locais (que contan co apoio económico do GDR para sufragar os gastos) é conservar o castro e facer del un reclamo turístico. A escavación en marcha é só un primeiro paso para pór en valor un castro que ten case tres hectáreas. «O que temos á vista é unha pequena mostra do que hai. Como pasa nestes xacementos, require dunha actuación continua cada temporada para darlle monumentalidade e volume», argumenta Pérez. Para profanos na materia, explica que sería preciso traballar unha xeración enteira; e compara o castro de Acea con San Cibrao das. «Ou das ten oito hectáreas, levan 30 anos traballando e hai unha hectárea escavada», sinala. E engade: «Vai pouco a pouco, non é fácil sacalo enteiro». Ao mesmo ritmo, para sacar á luz todo o castro de Acea (tamén chamado Outeiro do Castro) serían precisos 90 anos.