O ex rexedor cre que o partido está moi mal na Limia, e descarta sumarse a Cidadáns
12 dic 2018 . Actualizado ás 16:25 h.«Non descarto a posibilidade de ser o candidato do PP en Xinzo para as eleccións de maio». Son palabras de Isaac Vila, de 82 anos, o que fose rexedor de Xinzo durante máis dun cuarto de século, que, no entanto, tamén quere gardar prudencia. «Non tería ningún sentido que me postulase agora, sen ter falado antes coa dirección local, provincial e autonómica», dicía.
A reacción de Vila tras coñecer que a Audiencia confirmaba a inhabilitación de Antonio Pérez Rodríguez durante oito anos e medio para cargo público por prevaricación administrativa continuada foi de sorpresa. «A verdade é que non sei que dicir. Lamento a noticia, pero debo coñecer ben os detalles da condena», expuxo.
Ante os rumores que circulan desde hai semanas como eventual candidato de Cidadáns na vila, Vila negou tal opción. «Non falei con ninguén de Cidadáns. Iso non é verdade». Que deparará o futuro? «Desde hai tempo non teño contactos coa directiva do PP a nivel provincial ou galego. Descoñezo se eles tivesen xa un candidato definido, no caso, de que, como así sucedeu, a posibilidade de que volvese Antonio non fose factible», revelou.
Preguntada a súa valoración sobre a situación do partido a nivel local, Vila foi tallante: «É moi mala. Non me gustan cousas que vexo desde hai tempo, hai diferenzas». O veterano político asegurou que segue mantendo contactos frecuentes con destacados militantes do PP na vila. Considerou que debe ser a xunta local a que determine en breve prazo o nome do novo líder local do PP. «Eu non pensaba facer valoracións políticas ata pasado o 20 de xaneiro, cando se celebre o congreso provincial do PP. Coa nova situación creada agora, coa inhabilitación definitiva de Antonio, descoñezo cales serán os prazos para tomar decisións sobre o futuro do partido en Xinzo», asegurou.
A decepción do resultado
Vila deixou a alcaldía no ano 2010, aínda que seguiu sendo concelleiro ata os comicios de 2011, cando Pérez obtivo maioría absoluta, que revalidou en 2015.
A maior parte dos afiliados e cargos públicos limianos acolleron con enorme decepción a confirmación da condena a Pérez. «Agardabamos que lle absolvesen. Agora haberá que tomar unha decisión pronto desde a directiva local», afirmaba o ex tenente de alcalde Daniel Blanco Rodríguez. Outro destacado cargo orgánico expuña: «Algúns hoxe [por onte] pode que estean contentos, pero Antonio fixo unha gran labor e segue e seguirá tendo un gran peso no partido en Xinzo».
Todos os consultados conclúen que a maioría do PP limiano non aceptará, baixo ningún concepto, que Baltar ou Feijoo impoñan un novo líder sen o aval expreso da xunta directiva local, controlada por Pérez Rodríguez. Un dedazo desde Santiago ou Ourense provocaría, con case total probabilidade, a presentación dunha candidatura alternativa ao PP. Nunha recente reunión co núcleo duro de Antonio Pérez, Baltar comprometeuse a aceptar a resolución dos militantes a nivel local.