Situarase no lugar de Meixide e recuperará un total de 647 parcelas
26 sep 2020 . Actualizado ás 10:29 h.A aposta da Consellería de Medio Rural polas aldeas modelos colleu velocidade de cruceiro na provincia de Ourense. O departamento que dirixe o ourensán, José González, anunciou este venres a declaración da zona de Meixide, no municipio do oriente ourensán da Veiga, como nova aldea modelo de Galicia. Trátase do proxecto número 12 destas características, a maioría dos asentados na provincia ourensá. Neste caso, precisan fontes da administración autonómica, a iniciativa ten como obxectivo recuperar as terras en abandono da contorna da aldea para contribuír á súa posta en valor «mellorando a calidade de vida da súa poboación e, ao tempo, reforzar a prevención dos lumes na proximidade das vivendas».
A actuación servirá, precisan as mesmas fontes, para recuperar unha superficie de 71,28 hectáreas deste núcleo de poboación para destinalas á produción gandeira en extensivo. Actuaríase nun total de 647 parcelas, dun total de 151 propietarios. Así, nesta aldea do oriente ourensán realizarase a limpeza e a recuperación dunha franxa de 50 metros próxima ás vivendas, no marco do convenio de protección das aldeas fronte ao lume posto en marcha pola Xunta, Seaga e a Fegamp.
O resto do terreo será posto en produción coa actuación da Axencia Galega de Desenvolvemento Rural, en colaboración con produtores interesados no seu aproveitamento para crear actividade agrogandeira, mediante a produción gandeira extensiva ou cultivos de horta, cereal, pastos, froitos ou castiñeiros. Como é habitual nas aldeas modelo que lanza a Xunta de Galicia, todos os terreos recuperados serán incorporados ao Banco de Terras, de maneira que as persoas titulares reciben unha compensación económica anual. Desta forma produce beneficios, tanto para os donos dos terreos como para os que queren explotalos.