O atraso no peche da liquidación de 2017 apraza as contas
16 oct 2018 . Actualizado ás 16:15 h.O bipartito da Rúa renunciará a presentar orzamentos este ano. Con outubro xa mediado e aínda coa liquidación do 2017 sen pechar, os prazos non dan. Así o recoñece o rexedor, Luis Fernández Gudiña, que avanza que o obxectivo agora é ter lista a liquidación antes de que remate este mes. Esa é a consigna que lla deu aos funcionarios. E xa despois tocará empezar a traballar nos orzamentos. Non será nos de 2018, que ao final quedan cos prorrogados do 2017, senón que serán os de 2019. «Queremos aprobalos non inicio do ano», avanzaba Gudiña, que descartaba deixalos sen aprobar por tratarse de ano electoral.
Así, os que se aprobarán no primeiro trimestre do ano (antes da convocatoria de comicios) serán os primeiros que sacará adiante Gudiña tras a súa chegada á alcaldía. Os anteriores recibiron o visto e prace (de BNG e PSOE) en maio do ano pasado, coa nacionalista María González Albert ostentando o bastón de mando. Albert dimitiu un mes máis tarde, cumprindo o acordo de goberno que asinaran senllas formacións tras os comicios de 2015.