O artista de Viana Piquico inaugura no Marcos Valcárcel este xoves unha nova mostra
25 ene 2023 . Actualizado ás 05:00 h.A Ángel Manuel Rodríguez todo o mundo lle chama Piquico. Este ourensán con corazón de Viana do Bolo, municipio no que se crío ata que se mudou a Madrid para estudar Belas Artes, é un dos escultores galegos máis peculiares e queridos da súa xeración. Naceu no 65 na cidade das Burgas e desde fai unhas cantas décadas reside en Vigo, onde traballa como profesor de pintura nun colexio. «Estou a tres anos de xubilarme e poder dedicar todo o tempo do mundo ao que máis me gusta que é crear», admite. Aínda que non pasa un día sen que estea un ratito no seu taller. Froito de todo ese vórtice artístico xorden novas exposicións, de feito este xoves inaugura unha no centro cultural Marcos Valcárcel de Ourense . Titúlase Entroido, mobiliario vestido, escultura e é unha mostra perfectamente descrita nesas catro palabras. «Son 26 pezas que son mobles, esculturas e representacións do entroido», resume Piquico. «Levo anos metido nesta tradición tan nosa e agora o resultado verá por fin a luz. Encántame traballar a madeira porque é máis amable e libre», engade.
Unha exposición de escultura funcional e figurativa na que este artista de Viana xoga co orgánico e mestúrao con algún dos personaxes máis coñecidos do entroido da provincia como os propios boteiros, que tan ben coñece, os peliqueiros de Laza ou as pantallas de Xinzo. Plásmaos en mobles como lámpadas, cadeiras, aparadores, botelleros, mesas, espellos ou repisas, de todo. Esculturas que miden desde un metro ata case cinco e que mesturan a madeira con diferentes texturas, teas e cores. «Son obras que levan moito traballo e que teñen un acabado moi importante. Estou moi contento de volver a Ourense», admite Piquico, que di que o entroido pasarao entre Viana e Portugal. «Estou coñecendo as súas tradicións», conta. E quen sabe se a próxima exposición será sobre iso.