A Audiencia Nacional condena a ADIF e Renfe por un incendio forestal causado polas faíscas dun tren en Boborás
OURENSE
O alto tribunal español dá a razón aos comuneiros de Xurenzás, que percibirán 69.000 euros de indemnización
28 may 2022 . Actualizado ás 05:00 h.Sete anos despois de que ocorresen os feitos, a Audiencia Nacional acaba de dar a razón á comunidade de montes Costas de Xurenzás (Boborás), que deberá ser indemnizada por parte de Renfe e ADIF por un incendio forestal provocado polas faíscas dun tren que circulaba avariado, ocorrido en xuño do 2015. Aínda que un xulgado contencioso de Santiago de Compostela non vira responsabilidade das dúas operadoras no lume, que calcinou 180 hectáreas, agora o alto tribunal atende ao recurso dos veciños, representados pola avogada Rita Alén. Ve «nexo causal» e considera que ambas actuaron de forma neglixente.
«Quedou acreditada a realidade do incendio producido sobre as tres e media da tarde do 29 de xuño do 2010, apreciándose no atestado da Garda Civil a existencia de catro focos xunto á vía férrea e sinalando como causante un tren de mercancías que pasara con dirección ao Carballiño, polas faíscas desprendidas», recolle a resolución, na que os maxistrados dan por probado que as «labras incandescentes» que desprendía o convoi foron as causantes do desastre ambiental. Isto xa o determinou o primeiro fallo, con todo entón o xuíz non viu neglixencia na limpeza das vías, responsabilidade de ADIF, nin tampouco culpou a Renfe, xa que os vagóns eran doutra empresa.
Agora eses razoamentos quedan anulados. A Audiencia Nacional lamenta a escasa argumentación do primeiro fallo e razoa os motivos polos que ambas as operadoras deberán pagar 68.718 euros aos comuneiros de Boborás. «Aínda cando Renfe non sexa o propietario dos vagóns, debeu ter efectuado un control sobre o seu estado», advirten os togados, que ven «falta de dilixencia» na compaña.
En cando ao administrador ferroviario, responsable do mantemento das vías e os terreos contiguos, os maxistrados tamén o responsabilizan do incidente. Así, constatouse a presenza de maleza e restos de rozas en xunto á zona de paso do tren, unha circunstancia que facilitou a propagación do lume, ao facer de combustible. A maiores, os xuíces cuestionan que se deixase circular ao tren cando xa en Lalín se detectou que dos seus freos saía fume. Co diñeiro, ao que sumarán intereses, os afectados poderán repoboar o monte queimado.