A actriz Laura Míguez recolleu o galardón concedido ao festival
16 oct 2021 . Actualizado ás 05:00 h.A Deputación de Ourense decidiu crear fai uns anos o Premio Rodolfo Prada para distinguir propostas desenvolvidas no ámbito da xestión cultural. A iniciativa contribúe a pór en valor os proxectos que levan a cabo no sector e, ao mesmo tempo, a manter vivo o recordo de Rodolfo Prada, figura histórica entre a emigración galega en Buenos Aires e que chegou a ser o gran valedor de Castelao. Os premios están dotados con 3.000, 2.000 e 1.000 euros, ademais dunha peza creada polo escultor Buciños. Na edición deste ano o xurado decidiu outorgar o premio ao FITO por converterse nestes anos «en todo un referente entre vos principais eventos teatrais galegos». Patrimoniogalego.net e Carballo Interplay levaron os outros dous premios da convocatoria.
Actuación en Rianxo
O FITO organízao a compaña Sarabela Teatro e, cousas da profesión, os actores ourensáns tiñan cita na tarde do venres en Rianxo, onde representaban A lingua dás bolboretas. A directora do FITO, Fina Calleja, é unha das actrices que participa na montaxe.O galardón recolleuno Laura Míguez, quen en nome dos premiados sinalou que os organizadores do FITO estaban «encantados» co recoñecemento. A actriz tamén sinalou -no acto do Principal- que compartían o premio «con todos os organizadores das actividades culturais que se fan en Ourense, tanto as actuais como as que nalgún tempo existiron e se tiveron que marchar ou desapareceron», como o Corpo (a) terra, Pórtico do Paraíso, Outono Fotográfico, Xornadas de Banda Deseñada ou Bela Auria «e todos os demais porque a cultura fai mellorar a unha cidade».
A entrega do premio coincide coa celebración da edición número catorce do festival, que arrincou o pasado xoves e continuará ata o día 25. Este venres os membros da compaña Arun-Run foron os encargados de promocionar a oferta escénica deste ano coa súa intervención de rúa «Fitoexpress»