Ourense rebaixa o paro en 875 persoas en xullo pese ao impacto da quinta onda
OURENSE
A provincia gañou nun mes 1.115 afiliados á Seguridade Social
04 ago 2021 . Actualizado ás 05:00 h.Julio é un mes tradicionalmente positivo para o emprego. A campaña de verán anima as contratacións no sector servizos, que ten un gran impacto na economía ourensá. As restricións marcadas pola quinta onda do covid-19, que entraron en vigor na provincia a mediados de xullo, tiveron un impacto na hostalería pero aínda así o sector terciario converteuse no eixo sobre o que pivotó o descenso do paro (-578). Segundo os datos facilitados polo Ministerio de Traballo e Economía Social, na provincia ourensá o desemprego descendeu no último mes en 875 persoas, un 5,49 %. Con esta rebaixa, a cifra de apuntados nas oficinas do SEPE sitúase en 17.325. Trátase de 2.241 persoas menos que no mesmo mes do ano pasado.
Tamén en termos positivos moveuse a afiliación á Seguridade Social, con 103.591 cotizantes, o que supón unha subida de 1.115 en só un mes e de case 2.000 no último ano. O colchón dos ERTE aínda é unha ferramenta á que se aferran moitos empresarios para tratar de salvar empregos. No caso de Ourense, aínda están nesta situación un total de 1.615 traballadores (440 menos que en xuño).
Precisamente, a chegada da quinta onda está detrás dun descenso no desemprego que non é tan rápido como agardaba a patronal. «Foi un mazazo e pillounos por sorpresa no inicio dun verán que prometía ser mellor. A evolución da pandemia vai permitindo recuperar o emprego aínda que non nos termos que nos gustaría», explican desde a patronal ourensá. Desde Comisións Obreiras lamentan que a caída no paro se base en contratos precarios.
«Estamos a recuperarnos, pero é inviable manter a tantas persoas no persoal»
A contratación no sector hase visto freada coas novas restricións vixentes desde mediados de mes
A hostalería non acaba de levantar cabeza desde que empezou a pandemia do coronavirus. Cando as restricións empeza a relaxarse, outro pau golpéalles. En Ourense , os hostaleiros están cansos de que se lles impoñan medidas ante a subida de contagios. Agora hai que mostrar un certificado de vacinación, ter pasado a enfermidade ou ensinar unha proba negativa para poder entrar no interior dos locais da cidade. «Estamos a pagar nós por cousas que se permitiron, como os botellóns», apunta Abelardo Moreiras, encargado da tapería Portovello.
Durante os meses de verán, os persoais aumentaban debido á cantidade de clientes que cada día enchían os locais da cidade. Con todo, desde que empezou a pandemia, moitos empresarios tiveron que prescindir de parte dos seus traballadores: «Estamos a recuperarnos aos poucos, pero é inviable manter a tantas persoas no persoal», asegura Bibiana Darriba, que traballa de camareira na cafetería Lord. Na cafetería Lle Bon Vivant, situada en pleno parque de San Lázaro, tamén tiveron que reducir o número de traballadores. «Todos os veráns contratabamos a máis camareiros. Agora a entrado unha moza nova, pero para cubrir a marcha de outra», asegura a encargada Silvia Doallo.
As perdas cada vez nótanse máis. A pesar da chegada do verán, os hostaleiros non son optimistas e ven complicado remontar economicamente. «Agora no verán é máis difícil recuperarse. A xente escápase ao pobo, á praia...», explica Doallo.
Tamén a hostalería ourensá notou que os turistas non consumen tanto. «Estes días si que empeza a haber un pouquiño de turismo, pero non aumentou moito». Algúns non confían neste mes de agosto. «Non temos as expectativas moi altas con respecto a estas semanas de verán», asegura Doallo. Outros non perden a ilusión e as ganas de seguir adiante. «A cousa está un pouco frouxa, pero hai que ir sobrevivindo aos poucos», comenta Darriba.