A oficina de turismo de Ourense recibiu máis visitas este xullo que no mesmo mes dos anos prepandemia
OURENSE
A instalación municipal recibiu a 5.381 persoas, máis que no 2019 ou o 2018
04 ago 2021 . Actualizado ás 18:02 h.A concelleira de Turismo e Termalismo, Flora Moure, do PP, aproveitou o pleno que este martes celebrou o Concello de Ourense para informar dos últimos datos de visitantes da oficina de turismo municipal dos xardíns do Pai Feijoo. Ao longo de xullo pasaron por alí 5.381, o que supón un claro incremento con respecto ao mesmo mes do ano anterior (2.438), xa coa pandemia. Pero o que chama a atención é que ese rexistro é superior mesmo aos de xullo do ano 2019 e 2018, sen coronavirus.
«Hai cousas que non debemos estar a facer mal», dixo a popular Flora Moure, que respondía deste xeito ás críticas da oposición durante o debate de dúas mocións en relación ao Ano Xacobeo e a promoción do Camiño de Santiago pola Vía da Prata. Criticou a oposición, pero tamén o propio alcalde. Gonzalo Pérez Jácome denunciou a «discriminación» da Xunta de Galicia cara a Ourense e asegurou que as rutas xacobeas benefician basicamente á capital autonómica. «Non existe ningunha cidade no mundo con menos de 100.000 habitantes que teña os mesmos privilexios que Santiago», sentenciou o alcalde.
A pesar dos rozamentos entre uns grupos e outros no debate deste punto, houbo unanimidade na aprobación dunha das mocións, que reclama á Xunta e a Deputación un plan específico de promoción para a Vía da Prata. A outra, que foi emendada polo PP para reclamar investimentos ao Estado, tamén se aprobou pese ao voto en contra do PSOE.