O adestrador que dirixiu ás gañadoras do ouro de Barcelona 92 segue triunfando na elite mundial desde a Liga belga
25 jul 2021 . Actualizado ás 05:00 h.José Manuel Brasa Sanjurjo (Vigo, 1951) é un profesional con moito pouso na evolución do hockey herba español. O mítico ouro que conquistou a selección española feminina en Barcelona 92 viño seguido doutros moitos éxitos, forxados na súa paixón por un deporte ao que dedicou -e segue facéndoo- toda unha vida.
O olívico foi o as que se sacaron da manga os responsables do Centro de Tecnificación de Galicia (Cetega), ilusionado como un neno co seu novo labor: «O primeiro que me animou foi o cambio producido na federación galega, que levaba varios anos dando tumbos e sen ideas claras. Roberto Baratta tomou o temón desta parcela técnica. Cando mo expuxo, sentinme obrigado a colaborar».
A súa longa bagaxe na elite, inclúe unha folla de servizos con 51 anos interrompidos como adestrador, pasando polas seleccións españolas absolutas de herba e sala -tanto masculinas como femininas-, ademais de traballar en países como a India, Ucraína ou, na actualidade o Old Club da poderosa liga belga. Iso si, a voz sáelle potente ao falar de deporte de base, de canteira: «A canteira é o noso futuro, temos que traballar con moita seriedade cos mozos. Por iso, cando Roberto me falou de colaborar cos adestradores das seleccións sub 14, sub 16 e sub 18, ilusioneime deseguido».
Meu dito meu feito, Brasa aceptou converterse en asesor de Programas e Planificación e plantouse en Padrón, en canto tivo oportunidade: «Aínda que xa falaramos moito sobre o tema, decidín acudir á reunión das escolas que se desenvolveu en Padrón, para poder ver in situ cales eran as necesidades do hockey galego. A verdade é que non é moi distinta á do resto de países, con pequenos problemas endémicos que debemos intentar atallar».
De paso, o laureado adestrador aproveitou para sentar as bases do seu traballo nos próximos meses, como asesor de Programas e Planificación: «Aleccionaremos aos adestradores en reunións en liña, porque a tecnoloxía nos permite manter ese vínculo, mentres sigo en Bélxica. Os obxectivos pasan por deseñar adestramentos e exercicios modernos, centrarnos sobre todo no cerebro dos mozos e darlles opcións para mellorar as súas tomas de decisión». José Manuel mesmo vai máis aló e tamén fala da figura dun adestrador a desterrar: «Non podemos impor unha forma de xogar aos mozos, debemos ofrecerlles reforzos positivos e intentar adiviñar que tipo de hockey van ter que xogar en seis ou oito anos».
E dio unha persoa que, co paso das tempadas, non perdeu a ocasión para seguir reciclando os seus coñecementos e bebendo de todas as fontes dun deporte ao que se entregou en corpo e alma. Só así se explican rexistros como os seus doce títulos de campión de España de Hockey Sala con catro equipos diferentes e o carácter para afrontar desafíos de moi diversa índole, sen quedar ancorado no seu gran éxito como adestrador nos Xogos de casa, antes mesmo de rematar o século pasado.
Precisamente coa cita olímpica vixente na actualidade, atopámonos a Brasa Sanjurjo analizando á selección española, vía televisión: «É o maior acontecemento do deporte mundial. Ningún outro ten tantos seguidores nin transmite mellor os valores positivos, ademais de que é o mellor reclamo de difusión para calquera especialidade. Ademais ofrécenos aspectos técnicos sobre os que temos que traballar. Sen ir máis lonxe, no Arxentina - España vimos como presionaron e defendéronnos en zona. É algo que fai dez anos non sucedía no hockey de elite, pero ademais debemos marcarlle o futuro aos máis novos. Ensinarlles a xogar así e tamén como atacar ese tipo de sistemas.
No Cetega están felices pola incorporación, que sin duda permitirá incrementar a calidade da formación de técnicos na Escola Galega de Adestradores. Fichaxe estelar.