Un convenio permitirá que os comedores dos centros educativos reciban alimentos procedentes da actividade agraria provincial
21 jul 2021 . Actualizado ás 13:47 h.Escolares ourensáns alimentados de forma saudable e con produtos quilómetro cero. Ese é o obxectivo dun convenio de colaboración asinado entre o Instituto Ourensán de Desenvolvemento Económico (Inorde) e a Asociación de Desenvolvemento Rural, Adercou, que aglutina a concellos da comarca de Ourense.
O acordo permitiralles fomentar o consumo en comedores escolares de distintos produtos procedentes da actividade agroalimentaria da provincia ourensá, pero ademais, e co obxectivo de traballar a concienciación social sobre a necesidade de consumir alimentos de proximidade, organizaranse distintos tipos de actividades como cursos, visitas a centros educativos por parte dos produtores, e programas orientados a pór en valor o froito do traballo nas explotacións agrícolas da provincia. O Inorde achegará un calendario de produción, para que Adercou teña información sobre os que están en tempada en cada momento e poida desenvolver a súa programación para os comedores dos colexios nos municipios integrados. En concreto Adercou actúa sobre os municipios de Amoeiro, Barbadás, Cartelle, Coles, Esgos, Gomesende, A Merca, Nogueira de Ramuín, Ourense, Paderne de Allariz, Pereiro de Aguiar, a Peroxa, Ramirás, San Cibrao das Viñas, Toén, Vilamarín e Xunqueira.
Ademais desde o Inorde farase chegar aos comedores os produtos nos que os programas do Instituto Ourensán de Desenvolvemento Económico están a facer especial fincapé para a súa revalorización,como é o caso da pataca ou as razas autóctonas. «A maioría dos comedores escolares destes municipios son de xestión propia, o que facilita que mediante unha seire de acción de información, sensibilización e coordinación, poidamos apoiar aos productores localis e fomentar unha cociña saudable neses comedores, así como reducir a pegada de carbono», sinalou Rosendo Fernández, o presidente do Inorde. Fernández rubricou o convenio xunto con Manuel Seoane, presidente de Adercou, nun acto no que tamén estiveron presentes as xerentes do organismo provincial, Emma González e a do intermunicipal, Beatriz Martínez, respectivamente.