3.150 veciños da Baixa Limia, Terras de Celanova e Petín serán citados a cribados masivos
OURENSE
A curva de casos activos en Ourense sobe de novo e sitúase en 245
21 abr 2021 . Actualizado ás 19:26 h.A curva segue subindo na área sanitaria de Ourense, Verín e Valdeorras. Este mércores 21 de abril hai 245 casos activos, o que supón 10 máis que onte, tras detectarse 21 positivos e rexistrarse once altas. Soben os casos e tamén a presión asistencial, con 18 pacientes con coronavirus en planta (16 no CHUO e 2 no comarcal de Valdeorras) e oito na uci. Supón un novo incremento na unidade de críticos, na que o xoves había unicamente tres pacientes covid. É un crecemento importante pero aínda está lonxe de que o hospital teña que subir de nivel no plan de continxencia ideado para a pandemia (e que supón ir recortando servizos noutras áreas, como a cirurxía programada non urxente, se hai moitos pacientes en coidados intensivos). Así o dixo o conselleiro de Sanidade, Julio García Comesaña, na rolda de prensa desta mañá, na que explicou as novas restricións, que entrarán en vigor o venres. «A uci de Ourense ten 22 prazas, está lonxe do máximo, e a situación epidemiolóxica non nos fai temer», dixo.
Na provincia, Cualedro e Carballeda de Valdeorras manteranse en nivel máximo. Suporá manter o peche perimetral e a hostalería pechada. En nivel alto estarán O Barco de Valdeorras, Rubiá, Petín, Cortegada, Lobeira, Muíños e Padrenda, o que significa que a hostalería só poderá servir en terraza, e cunha capacidade do 50 %. O nivel medio entran Cartelle e Lobios, polo que a restauración terá unha capacidade do 50 % na terraza e do 30 % no interior.
O xerente da EOXI, Félix Rubial, non entra a cualificar se os 245 casos activos son moitos ou poucos. «É case o dobre que fai 3 semanas; pero a incidencia acumulada en Ourense é a máis baixa de Galicia, que é tres veces menos que a media española», apunta. Defende que se contivo a subida grazas a unha «estratexia traballada» que marca que a desescalada é paulatina e que nela se fai unha procura proactiva de posibles casos asintomáticos. «Para non atoparnos brotes explosivos, facemos cribados», explica, naqueles puntos onde a situación sinala peores datos. Nesa liña o Sergas organizou probas masivas en sete concellos da provincia para esta fin de semana.
O Sergas tamén empezou a citar para un cribado masivo a 300 veciños de Petín . Neste caso, a fórmula elixida é diferente, xa que non se montará un operativo especial na localidade durante unhas horas, senón que se pedirá aos convocados que acudan a facerse a PCR ao covidauto instalado nun lateral do Hospital Comarcal de Valdeorras, no Barco. As citas serán desde mañá ata o luns.
Na listaxe de concellos con medidas restritivas para frear o avance da pandemia aparecen varios concellos de A Baixa Limia, na que hai 14 casos activos. Muíños ten 6 veciños contaxiados; Lobeira 5 e Lobios 3. Na de Terras de Celanova , destaca a situación de Cartelle , con 6 positivos, e de Ramirás e Verea, con 3. Desde a área sanitaria púxose agora o foco nesas dúas comarcas, seguindo o criterio de anticipación que está a marcar a desescalada. E iso tradúcese en a prema en aplicar medidas cando os números din que a incidencia acumulada (é dicir, o número de contagios detectados nese período) a sete días é alta (e non a 14 como se utilizaba antes), e tamén en a convocatoria de cribados masivos entre a poboación. O sábado e o domingo citarase a 2.850 ourensáns para que acudan a facerse unha proba PCR. O obxectivo é detectar posibles pacientes asintomáticos que estarían a contaxiar ao non saber que están infectados. Búscase illar a eses posibles casos canto antes, para cortar así a cadea de transmisión.
Os cribados comezarán o venres. De 15.00 a 17.00 horas citarase a 300 veciños de Verea para acudir ao centro de saúde. Tamén empezará ás tres (e ata as seis e media) o cribado a 500 veciños de Ramirás , que se fará no pavillón do Picouto. O sábado pola mañá ás 9.00 horas comezarán as citacións no centro de saúde de Lobeira a 150 veciños; mentres que ás 11.30 comezarán as probas a 400 persoas no pavillón de Muíños e a 600 no polideportivo de Lobios . Xa pola tarde, os equipos de enfermería desprazaranse ata o polideportivo de Outomuro en Cartelle , onde están citadas 900 persoas, no cribado máis numeroso desta fin de semana na provincia. En todos os casos, as citas chegarán por SMS ao teléfono móbil de persoas de entre 18 e 74 anos.