A violencia machista ten activos 160 casos na capital, que vixían as forzas policiais
OURENSE
O subdelegado do Goberno ve positivo o desvío á Coruña das chamadas ao 091 porque permite máis axentes na rúa
20 abr 2021 . Actualizado ás 05:00 h.A violencia machista non cesa nin en tempos de pandemia pero as cifras de denuncias que presentan mulleres que aseguran ter sido vítimas de malos tratos e os casos que se vixían afrontan un lixeiro retroceso. Polo menos na capital ourensá. Así se constatou durante a reunión da xunta local de seguridade, que este luns se desenvolveu na sede da subdelegación do Goberno da capital. No encontro, presidido polo subdelegado, Emilio González Afonso, e o concelleiro de seguridade, Telmo Ucha, púxose sobre a mesa a redución nun 11 % do número de casos activos no sistema VioGén desde o pasado mes de decembro.
Entón eran 180 as denuncias en seguimento, mentres que agora son 160. Destes casos, dous presentan un risco alto, seis máis se consideran de risco medio, outros 49 de perigo baixo e nos 103 restantes non se aprecia perigo para a vítima. En canto ao seguimento, a Policía Nacional ocúpase de 97 casos, outros vinte corresponden á Policía Autonómica e 43 á Policía Local.
No encontro tamén se informou de que as estatísticas da Policía Nacional reflicten un descenso do 12,8% na cifra de delitos cometidos no ano 2020 no municipio de Ourense. Así, entre os meses de xaneiro e decembro rexistráronse un total de 3.691 infraccións penais, mentres que no mesmo período de 2019 foran de 4.231. «O índice de infraccións penais no concello de Ourense reduciuse nunha porcentaxe moi importante, aínda que o 2020 foi un ano atípico no que a seguridade tamén se viu condicionada pola pandemia da Covid-19», asegurou o subdelegado, que destacou a caída dos delitos contra a liberdade e indemnidad sexual ou dos roubos con forza en domicilios e os furtos.
Felicitación ao CNP
Ante este escenario, e en presenza do comisario Juan Carlos Blázquez, o subdelegado quixo felicitar «aos mandos e aos funcionarios da Policía Nacional pola gran profesionalidade que demostran e a súa capacidade de traballo ao compatibilizar os labores para garantir o cumprimento da normativa sanitaria e de seguridade cidadá», lembrando a boa colaboración que existen entre as distintas forzas de seguridade que teñen competencias na capital.
A recente eliminación na comisaría ourensá do servizo do 091, cuxas chamadas se destinan agora a unha central de comunicacións da Coruña, tamén se tratou durante a reunión, máxime despois de ter sido obxecto das críticas sindicais. Afonso cre que a medida é positiva xa que permitiu reforzar os equipos de investigación e seguridade cidadá: «Ouurense conta con máis policías na rúa e nos traballos de investigación, permitindo mellorar sensiblemente os operativos que velan pola seguridade dos ourensáns», dixo.
Durante a reunión tamén se deu conta de que se manterá a vixilancia nos arredores dos colexios para combater o tráfico de drogas e as condutas violentas. Así mesmo, destacouse que este curso as actividades sobre o acoso escolar ou o uso de novas tecnoloxías destinadas a estudantes están a facerse de forma telemática.