O foco de Valdeorras segue crecendo, e esténdese a Vilamartín
20 abr 2021 . Actualizado ás 17:19 h.O cribado realizado en Cualedro o luns destapou sete positivos en coronavirus entre os 426 veciños que acudiron a facerse a PCR (á que estaban convocados 600). É un número elevado, tendo en conta que se trata de persoas que non tiñan síntomas (o que se coñece como positivos asintomáticos) e que non estaban considerados contactos estreitos doutros infectados, posto que nese caso terían sido citados a facerse a PCR no hospital comarcal. Alí terán que ir todos aqueles que teñan estado con estes sete veciños nos últimos días sen manter as medidas de seguridade: sen máscara, a menos de metro e medio e durante máis de 15 minutos. Desta forma ábrese un brote de índole familiar que se considera a orixe da maioría dos 9 casos activos que se contabilizaban onte. Os 7 positivos de hoxe fan subir o balance ata os 15 pacientes (habería que descontar unha alta). A maioría están na súa casa pasando a enfermidade, pero non todos. Un dos pacientes tivo que ser derivado á uci do CHUO porque empeorou a súa situación. «Levamos unha sorpresa, unha sorpresa relativa, porque cando un concello para a nivel máximo de restricións cun brote explosivo, xa se fai un cribado para detectar posibles positivos asintomáticos e así frear a transmisión», explica o xerente da área sanitaria, Félix Rubial, que en todo caso recoñece que cos datos aumenta a preocupación. Ademais, agora iníciase o rastreo dos contactos estreitos deses positivos, o que fai pensar como moi probable que a cifra de casos siga crecendo nos próximos días.
A situación de crecida non é única de Cualedro . En Verín o luns tiñan 5 casos activos, e este martes 20 de abril soben xa a 9.
O foco de preocupación vírase agora cara ao sur provincial, tras ter estado posto en Valdeorras días atrás. E aínda non decaeu, porque a curva na comarca segue subindo. O Barco de Valdeorras suma tres casos para chegar a 27; mentres que en Carballeda teñen 21, tras dar positivo dous convivientes dunha persoa que estaba en illamento desde hai varios días. Rubiá, A Rúa de Valdeorras e Petín continúan con tres casos activos; e entra na listaxe de concellos con casos Vilamartín de Valdeorras, cunha persoa contaxiada. Dous dos pacientes de Valdeorras están ingresados no hospital comarcal, mentres que unha terceira persoa tivo que ser derivada ao CHUO tras complicarse o seu estado. «Eu non vou falar de control con cifras crecentes, pero alarmante a situación non é», asegura Rubial en referencia a Valdeorras.
Tampouco a cidade consegue dobrar a curva, senón que sobe un positivo máis para sumar 69 veciños contaxiados.
Verín, Valdeorras e Ourense son os tres puntos con maior número de casos sobre o cómputo xeral, que hoxe volve rexistrar un ascenso. Hai 235 ourensáns contaxiados, tras rexistrarse 17 novos contagios e 8 altas.
Hai 12 pacientes en planta no CHUO e dous no comarcal de Valdeorras, mentres que soben a 7 os ingresados na uci.