2.476 ourensáns de entre 70 e 79 anos recibiron unha dose de Pfizer
20 abr 2021 . Actualizado ás 05:00 h.O domingo había 3.090 ourensáns de entre 70 e 79 anos citados para vacinarse, en Expourense e nos hospitais comarcais de Verín e Valdeorras. Acudiron un total de 2.476, segundo os datos da Consellería de Sanidade, o que supón que o 80 % púxose a vacina. Isto significa que un de cada cinco dos convocados decidiu non ir.
E co inicio da semana, continúa a campaña de vacinación. «Semana importante como van ser todas a partir de agora», segundo dixo o conselleiro de Sanidade, Julio García Comesaña, na súa visita á Rúa para asinar o convenio para a construción do futuro centro de saúde da localidade. Séguese inxectando nos hospitais, nos centros de saúde e en Expourense, coa vista posta no final de semana para tres novas xornadas de vacinación masiva. A franxa de idade obxectivo agora mesmo é a dos 70 aos 79 anos. Empezouse a chamar aos de máis idade, e para hoxe mesmo xa están citados os de 72 anos para vacinarse no comarcal de Valdeorras. De xeito paralelo, continúa a vacinación de inmobilizados de máis de 80 anos, e os de entre 60 e 65.