Esta fin de semana máis de 5.000 persoas están citadas para a primeira dose
17 abr 2021 . Actualizado ás 05:00 h.Ourense aínda está lonxe de conseguir que o 70 % da poboación estea vacinada do coronavirus e poder entón falar da inmunización de rabaño que, suponse, levaranos a dar pasos adiante na volta á normalidade. Aínda queda moito para entón, pero non tanto para conseguir o 29 % con polo menos a primeira dose posta. É a porcentaxe que o mércores marcou o presidente da Xunta, Alberto Núñez Feijoo, como obxectivo para esta semana. Cos datos do día 15, na provincia hai 34.557 persoas que completaron a inmunización tras recibir as dúas doses, e outras 46.966 teñen a primeira inxección posta. En total suman 81.523, o que supón o 26,58 % da poboación total da provincia (306.650 veciños, segundo os datos oficiais do Instituto Nacional de Estatística).
Faltan aínda por contar as vacinas postas o xoves e o venres (dous días que estiveron especialmente centrados nos pacientes de risco, aínda que tamén continuaron as vacinacións masivas), e habería que sumar a previsión da fin de semana. Para hoxe están citados 2.125 ourensáns de entre 60 e 65 anos, que recibirán a vacina de AstraZeneca en Expourense ou nos hospitais comarcais de Verín e Valdeorras, segundo o seu lugar de residencia. O domingo son 3.090 as persoas de entre 70 e 79 anos citadas nos mesmos recintos, neste caso para vacinarse coa dose de Pfizer. O luns volverá a campaña tamén aos centros de saúde.