Nas últimas horas detectáronse 31 positivos, unha cifra que non se rexistraba desde a primeira metade de febreiro
03 mares 2021 . Actualizado ás 11:52 h.Despois de 33 días coa curva en baixada, o balance do mércores 3 de marzo sinala que hai un cambio de tendencia na área sanitaria de Ourense, Verín e Valdeorras: soben os casos activos. Hoxe son 284 os ourensáns que están a pasar o covid, catro máis dos que aparecían no rexistro de onte. Non significa que se detectaron 4 casos novos, porque tamén houbo altas. O martes déronse por curadas 26 persoas; mentres que outras 31 confirmáronse como positivas en coronavirus. Facía máis de medio mes que non se rexistraban tantos novos casos nunha única xornada. Hai que remontarse ao 14 de febreiro para rexistrar unha cifra tan alta.
E a situación de hoxe reverte unha tendencia que comezou o 30 de xaneiro. Ese día por fin comezaba a baixada da curva da terceira onda, que marcou o seu teito a véspera, con 2.989 casos activos. Desde entón, cada xornada a cifra baixaba, porque a diario había máis altas que novos contagios. Ata hoxe. Aínda é pronto para que salten as alarmas, pero non é un bo dato.
Dos 284 enfermos por covid na provincia, a maioría están en illamento domiciliario; pero hai 36 persoas hospitalizadas. Destas, 34 están en planta: 29 no CHUO e 5 no hospital comarcal de Verín; e 2 na uci do CHUO.