4.479 pacientes deixaron atrás o covid no mes con máis persoas curadas
02 mares 2021 . Actualizado ás 05:00 h.Febreiro pechouse como o mes con maior número de altas no que levamos de pandemia. Cada día rexistráronse unha media de 159 curacións, para sumar un total de 4.479. É o mellor mes neste sentido (e iso que é o máis curto do ano), seguindo a evolución lóxica de que xaneiro foi o peor en canto a contagios. O primeiro mes do 2021 pechouse con 4.679 novos casos, parte dos cales xa negativizaron antes de iniciarse febreiro, que foi cando a maioría dos contaxiados recibiron a alta.
En xeral, un paciente que non precisa asistencia hospitalaria recibe a alta aos dez días de dar positivo, sen necesidade de confirmalo cunha nova proba diagnóstica. Non sucede así coas persoas ingresadas no hospital, os usuarios de residencias para persoas maiores ou con discapacidade, e cos traballadores sociosanitarios (é dicir, o persoal de xeriátricos, centros de día, hospitais ou centros de saúde, fundamentalmente). A todos eles se lles repiten as probas e non reciben a alta ata que a PCR di que son negativo en coronavirus. É por iso que hai casos que seguen activos durante moitos máis días que eses 10 que se usan como norma xeral.
Que febreiro fose o mellor mes en canto a altas non significa que non houbo novos casos. De feito, coas restricións máis duras desde o estado de alarma en vigor -desde o 29 de xaneiro ata o pasado venres todos os concellos estiveron pechados perimetralmente, os ourensáns só podían estar cos seus convivientes e a hostalería traballaba unicamente para servir a domicilio ou para levar- aínda se detectaron 545 contagios. Iso si, o ritmo foi moitísimo menor que no mes anterior, e en febreiro por cada novo caso detectado rexistrábanse oito altas.
Así se explica como se ha ir dobrando a curva desde o pico rexistrado o pasado 29 de xaneiro, cando había 2.989 ourensáns pasando o covid. Desde ese día, a baixada foi continua ata chegar aos 291 casos actuais. A maioría están en illamento domiciliario, pero aínda hai 39 persoas que precisan ingreso hospitalario. Hai 36 persoas en planta: 32 no CHUO e 4 no comarcal de Verín; e 3 na unidade de críticos de Ourense. Desde o domingo (e tras o falecemento do único paciente ingresado), a planta covid do hospital comarcal de Valdeorras está baleira.
Non se pararon os contagios nin tampouco a peor cara da pandemia. Faleceron 54 pacientes con covid. O peor mes foi abril, cando se contabilizaron 99 vítimas; as 84 de outubro situárono no segundo posto; e en novembro morreron outras 56. Desde o inicio da pandemia faleceron 407 das 14.544 persoas que se contaxiaron neste tempo. 13.846 curáronse.
A cidade baixa dos 100 casos
Coa entrada de marzo, a cidade de Ourense deixaba atrás o seu peor mes. Comezou febreiro con 1.023 casos activos, o seu pico en toda a pandemia. Onte esa cifra caía ata os 97. En Verín quedan 13 pacientes, 12 no Barco, 11 no Carballiño e 10 en Celanova.