Usuarios e operarios compartiron as instalacións no primeiro día laborable coa nova infraestrutura en servizo
08 feb 2021 . Actualizado ás 20:04 h.Chegar á nova terminal de autobuses da estación intermodal non é doado. Co aparcadoiro do ADIF aínda en obras, atopar onde deixar o coche é unha tarefa que require de paciencia. Tamén é difícil chegar a pé porque o acceso non conta cun paso de peóns na súa contorna inmediata e moita xente cruza igualmente por alí, co perigo que iso supón. E, xusto do outro lado, o primeiro que recibe aos usuarios é unha beirarrúa inacabada cun gran charco de auga.
A choiva puxo a proba a nova infraestrutura este luns, o primeiro día laborable coa nova terminal de buses en funcionamento. No edificio había operarios traballando para instalar un pavimento antiescorregadizo que evitase esvaróns e fóra tamén había obreiros instalando a sinalización da distancia de seguridade nas plataformas, arranxando pequenos danos nas papeleiras ou dando os últimos retoques á porta de seguridade.
Os traballadores mesturábanse cos usuarios da estación. Os consultados por La Voz de Galicia mostráronse satisfeitos coa infraestrutura, especialmente en comparación coa do Pino (agora demolida). «Aquilo era unha pocilga. Isto é unha marabilla, mellor imposible», dicía José Benito López, que agardaba un bus con destino a Entrimo. Fai esa viaxe cunha frecuencia semanal e asegura que a terminal está ben dimensionada. «Xa lle sobra», di mesmo. Lucía Freites, que volvía a casa tras visitar a achegados en Ourense, tamén comparou a vella terminal coa nova e di que esta é «moi bonita».
«Aínda non lle collemos a graza», recoñecía, por outra banda, Antonio Araújo Rodríguez, que destacaba o cómodo que é que as terminais de buses e de trens estean tan próximas entre si, algo que lle será de gran utilidade á súa filla, que traballa en Sanxenxo, segundo di. «Antes era un problema porque podías perder a conexión indo dunha á outra», explica o home.
