Na provincia, con 277 casos de coronavirus adscritos aos centros educativos, o IES de Allariz é ao que máis se asocian, 23
21 ene 2021 . Actualizado ás 18:08 h.Os casos de coronavirus asociados polas Consellerías de Educación e Política Social aos centros educativos da provincia de Ourense soben hoxe a 277, dez máis que onte. Tamén se incrementa o número de aulas pechadas: xa son 12, a última no CEIP do Couto, ao que se adscriben 4 positivos.
Do balance sae, por exemplo, o CEIP de Castrelo do Val, que ata onte contabilizaba un afectado. E entra, con todo, o IES Castro de Baronceli, en Verín , ao que se vinculan dous. Tamén o CPR Litocentro, na cidade de Ourense, cun. En todo caso, dentro deste baile de cifras hai múltiples matices: os casos, aínda que se asocien a un centro educativo en concreto, non teñen a súa orixe necesariamente alí, e xeralmente rexístranse en contornas familiares; e ademais, non engloba só a alumnos ou profesores, senón tamén ao resto de persoal que ten algún tipo de relación co centro en cuestión.
O repunte máis marcado da xornada rexístrase, unha vez máis, no IES de Allariz . Hai 23 casos de covid-19 asociados ao instituto da localidade allaricense, onde tamén hai unha aula pechada. Este mércores había 18 positivos.
Mentres, a Junta de Persoal Docente da provincia de Ourense avisou este xoves de a «delicada situación que están a atravesar numerosos centros educativos ourensáns na volta á actividade lectiva despois do Nadal». Neste sentido, instaron a que a Xunta «tome as medidas necesarias, como realización de PCR's e cribados masivos nos centros, para garantir a seguridade nas aulas e o axeitado desenvolvemento das actividades escolares».