Os equipos de vacinación visitarán hoxe 15 centros asistenciais da provincia
31 dic 2020 . Actualizado ás 05:00 h.O martes comezou a campaña de vacinación do coronavirus na provincia de Ourense. Inocencio Corbal, de 90 anos e natural de Sarreaus, foi o primeiro. Esa primeira xornada 29 persoas recibiron a primeira dose da vacina de Pfizer: os 20 residentes e os 6 traballadores da vivenda comunitaria San Marcos II de Cudeiro (Ourense) e tres enfermeiros dos once equipos que durante as próximas semanas visitarán as máis de 140 residencias e centros para persoas maiores e con discapacidade que hai na provincia. Onte a campaña xeneralizouse e máis de 700 recibiron o primeiro das dúas picadas (terán que administrarlles unha segunda dose en 21 días); e hoxe está previsto vacinar a outras 700 persoas máis, usuarios e traballadores de 15 centros, situados en Chandrexa de Queixa, Montederramo, Parada do Sil, Xinzo de Limia, Celanova, Cartelle, Quintela de Leirado, Baños de Molgas e Paderne de Allariz.
É por iso que, unha vez completado o percorrido previsto para hoxe polos once equipos de vacinación (formados cada un por dous enfermeiros procedentes de centros de saúde, que contan co apoio dun terceiro compañeiro en momentos puntuais), preto de 1.450 ourensáns recibirán o 2021 coa vacina posta. Pasado o Ano Novo e a fin de semana, a campaña de vacinación renovarase o luns. O obxectivo é administrar a primeira dose a unhas 9.000 persoas en algo menos de tres semanas, para despois poder iniciar a segunda rolda.
Desde o Sergas aseguran que a primeira xornada de vacinación masiva transcorreu sen ningunha incidencia na provincia de Ourense.