En Sybaris 2.0 non só envían as súas elaboracións a domicilio, ponlles listas de reprodución
25 novs 2020 . Actualizado ás 05:00 h.Desde que chegou á cidade, Sybaris 2.0 tivo a clara intención de crear experiencias culinarias para os seus comensais. Combinando a súa excelente proposta gastronómica con boa música, unha estética que lembra a un fogar cheo de vida e de xente, e tamén co viño máis adecuado a cada prato e a cada padal -de aí a súa faceta como vinoteca-. As restricións vixentes limitaron a súa pack completo, especialmente coa imposibilidade de encher de xente o seu restaurante. Máis aló de afundirse, Jacobo Mouteira, propietario do local situado na rúa Cardenal Quiroga, púxose a pensar como podería trasladar o ambiente de Sybaris ás casas dos seus clientes sen desligarlo da comida. E a resposta non foi outra que: a través da música. As propostas de Luis Romaní, xefe de cociña do restaurante, para o servizo a domicilio van maridadas con cinco listas de reprodución en Spotify, ás que o propio cliente accede escaneando un código QR. «Cando escoitas música 14 horas ao día, dásche conta da importancia que ten. Esta é outra forma de coarnos no comedor dos nosos clientes», di Jacobo. Unha inclúe os clásicos de todos os tempos, unha é de jazz, outra de rock, de indie e a Flow Away, «para deixarse levar e gozar».
O epicentro de todo segue sendo a comida. Propostas diferentes, orixinais e suculentas que Luis Romaní vai modificando e engadindo cada semana. Brioche de steak tartar, baos de carrillera estofada con crujiente de cebola, wok de fideos gambón e cachucha, empanadillas de centola con agridoce de pemento de Padrón ou costela de vaca a baixa temperatura. Ademais do menú diario por 12,50 euros que segue manténdose. Os pratos hai que rematalos en casa, ben mesturando ingredientes, vertendo unha salsa ou quentando 30 segundos un pan. «É unha forma de participar e divertirse no proceso e tamén de asegurar que comen o noso produto no seu estado perfecto e sen perder calidade na viaxe», remata Jacobo. Só queda pedir e subir o volume.