Por que a futura estación de autobuses de Ourense non vai dar diñeiro?
OURENSE · Exclusivo subscritores
O déficit anual que prevé a Xunta rolda os 30.000 euros
30 sep 2020 . Actualizado ás 15:14 h.Á futura concesionaria da estación de autobuses de Ourense, que se constrúe dentro do novo proxecto da intermodal da Ponte, non lle resultará sinxelo sacarlle rendemento económico á súa explotación. Iso é, polo menos, o que consideran os técnicos que elaboraron o prego de condicións para adxudicar o servizo, ao que optan dúas candidatas -as empresas do sector do transporte Gavilanes e Monbus rivalizan por facerse coa xestión dentro de dúas ofertas con outros socios- e que se atopa en fase de resolución.
O informe que elabora a Xunta e que inclúe na documentación do concurso apunta a que o déficit anual do recinto roldará os 30.000 euros. É por iso, que o prego de condicións establece unha compensación anual máxima de 49.766 euros para darlle unha marxe de beneficio de polo menos un 6 % á futura concesionaria. Iso suporía un desembolso nos cinco anos de duración prevista do contrato de 248.000 euros. Finalmente será menos, xa que as dúas candidatas ofrecen rebaixas nese canon para tratar de facerse co contrato. Unha delas, de feito, rebaixa a cero euros esa compensación. É a proposta de Monbus, que obtivo menos puntos na oferta técnica. A lanzada por Gavilanes rebaixa esa cantidade ata os 199.000 euros, un 19 % menos.
Por que se prevé deficitaria a instalación? O principal motivo que se desliza no informe ten que ver coa escasa marxe para lograr outros ingresos alleos á explotación do servizo de transporte de viaxeiros. É dicir, a ausencia de oferta hostaleira ou comercial e dun aparcadoiro propio lastra as opcións de sacar rendemento económico á explotación. O orzamento basee utilizado pola Xunta apunta a uns ingresos anuais de 184.000 euros. Desa cantidade, tan só se prevé que 18.049 euros cheguen a través dunha vía que non ten que ver directamente coa expedición e venda de billetes e o alugueiro das dársenas. A marxe para acadar outros beneficios limítase, ao carecer de oferta hostaleira o edificio de viaxeiros, ao alugueiro mensual do despacho de billetes (2.948 euros ao ano), facturación e entrega de equipaxes e encargos en consigna (5.826 euros), máquinas de vending (7.200 euros) e publicidade (1.080). A concesionaria tampouco terá a posibilidade de recibir ingresos vinculados ao aparcadoiro subterráneo, que será xestionado directamente desde a estación de ferrocarril.
No capítulo de gastos , o presuposto tipo estima unha cifra de 213.437 euros. A partida máis elevada sería para persoal ( 76.421 euros). Hai outras que tamén supoñen un esforzo importante, como é o caso do capítulo de limpeza e vixilancia (66.581 euros) ou subministracións e material fungible (38.301 euros).