Tras case tres décadas á fronte do grupo téxtil, o modista ourensán renuncia á presidencia
29 may 2020 . Actualizado ás 20:08 h.A saída de Adolfo Domínguez da primeira liña do grupo téxtil ourensán completouse esta semana coa súa renuncia á presidencia tras 28 anos á fronte. A substitución xeracional en favor da súa filla Adriana Domínguez, que xa era conselleira delegada desde xullo do 2017, foi aprobado por unanimidade polo consello de administración. Adriana convértese, xa que logo, na nova presidenta executiva da compaña. A decisión referenda a sucesión natural na firma de moda de autor, que agora debe encarar o escenario posterior ao coronavirus, que golpeou de cheo ao sector. De feito, o reto máis inmediato para a nova presidenta de Adolfo Domínguez será pilotar á compaña e sacala con éxito do ERTE que afectará, en principio, a máis de 800 traballadores ata mediados do ano que vén.
A pesar de que deixa a presidencia, Adolfo Domínguez permanecerá no órgano de administración como conselleiro dominical. O creador galego é o principal accionista cun 31,5 % do capital da firma que cotiza en bolsa. Cos 70 anos recentemente cumpridos, Adolfo Domínguez tomou as rendas da firma herdada dos seus pais desde 1980 cunha aposta pola moda de autor e con valores dunha marca simbólica, diferente e global. Baixo a súa dirección, a compaña foi a primeira empresa de moda en España en abrir tendas no estranxeiro (1980), a primeira en lanzar un perfume (Auga Fresca, 1990) ou a primeira en saír en bolsa (1997). Entre os momentos máis complicados aos que tivo que facer fronte atópase o incendio que en 1991 arrasou as súas fábricas ou a opa hostil que no 2011 lanzou o grupo Cortefiel contra a empresa.
Adriana Domínguez é a filla maior do ata agora presidente e protagonizou a nova etapa da compaña desde o 2016. Economista de formación, a nova presidenta executiva encarna a terceira xeración da empresa fundada polos seus avós no ano 1950. Desde a súa chegada, renovou por completo o modelo de xestión, en tándem co actual director xeral, Antonio Ponte. Antes da chegada do covid-19 e o seu impacto no sector téxtil, a firma lograra recuperar a senda do resultado operativo positivo tras unha década e lograra subir as vendas totais. Na actualidade, o grupo ten o 52 % das súas tendas fóra de España e eleva ata 391 os puntos der venda en 22 países. No último exercicio auditado facturou 112 millóns de euros.
Os membros do consello de administración tamén aceptaron a renuncia do xornalista José Manuel Rubín como presidente da comisión de Nomeamentos e Retribucións, na que seguirá como conselleiro. O posto ocuparao a conselleira independente, economista e especialista en moda, Maite Aranzábal. O consello está formado por oito persoas.