Caballero: «A provincia foi o epicentro da primeira gran vitoria da maioría progresista»
OURENSE
O PSdeG defende a lista ourensá: «É un equipo ganador»
10 mares 2020 . Actualizado ás 05:00 h.Segundo Gonzalo Caballero, candidato do PSdeG á presidencia da Xunta, «en Galicia hai un vento de cambio que vai ser imparable o día 5 de abril». E Ourense, engadiu, terá un papel protagonista en ellou. Esta provincia foi, segundo dixo, «o epicentro da primeira gran vitoria da maioría progresista galega que impediu a Feijoo pechar o paridoiro de Verín e seguir adiante no seu plan de pechar todos os paridoiros dos hospitais comarcais de Galicia».
O líder dos socialistas galegos fixo estas declaracións con motivo do acto de presentación da candidatura que o PSOE presenta por Ourense para o próximo 5A. O acto, que tivo lugar aos pés da ponte romana, contou con boa parte dos membros da lista electoral, encabezada por Marina Ortega e Juan Carlos Francisco Rivera. Ambos foron elixidos fai só catro meses para formar concorrer ao Congreso a primeira, e ao Senado, o segundo.
«Xa encabezaron as candidaturas nas eleccións xerais. E o facemos porque o PSdeG pon o mellor para xogar a gañar estas eleccións. E, aquí en Ourense, aínda que non lle guste nada ao PP nin a Baltar nin a Feijoo, o PSOE no 2019 obtivo uns resultados históricos», argumentou Gonzalo Caballero, que lembrou que nas xerais do pasado mes de novembro a cidade de Ourense foi a que mellor resultado de porcentaxe de votos deu aos socialistas. Ocorreu «xustamente cunhas candidaturas que encabezaban ao congreso Marina Ortega e ao Senado Juan Carlos Francisco», dixo o candidato socialista á presidencia
«Este é un equipo ganador», sentenciou Caballero, que tamén citou explicitamente a Carmen Rodríguez Dacosta, Eduardo Ojea Potolo, Marina Tallón, Elena de Prada, José Antonio Nóvoa e Bibiana Iglesias . «Temos as pilas cargadas, temos os deberes feitos, estamos preparados e facemos un chamamento á mobilización», sinalou o líder do PSdeG, que fixo fincapé en que, tras once anos á fronte do goberno, «Feijoo deixa unha Galicia que foi a peor».
O candidato socialista destacou o abandono do medio rural e criticou a rolda de almorzos que o presidente autonómico está a celebrar nas cidades para facer balance da súa xestión. «Feijoo está pechando ou ciclo», dixo Caballero, que resaltou a súa aposta polos servizos sociais. Se logra chegar á presidencia da Xunta, comprometeuse a axilizar as valoracións da dependencia e a facer efectivas as axudas con carácter inmediato. Ademais, anunciou un plan estratéxico de centros de día e residencias públicas para maiores. Segundo asegurou, en Galicia faltan unhas 15.000 prazas.