Seis triunfos consecutivos en casa revalorizan as opcións ourensanistas na Terceira División
19 ene 2020 . Actualizado ás 20:29 h.Un gol nos primeiros compases e non cometer erros de vulto. Con máis eficacia que xogo vistoso, a UD Ourense impúxose ao Paiosaco: 1-0.
Comezaron os homes de Fernando Currás como un auténtico ciclón, acurralando aos visitantes na súa área e forzando lanzamentos de esquina consecutivos, ata que Marquitos trianguló con Champi e Alfredo, cuxo centro foi cabeceado á rede polo atacante porriñés. Era un deses partidos que cheira a goleada, pero o arreón rojillo difuminouse soíño.
Aos poucos, o escuadrón dirixido por Juan Riverio comezou a saír da cova e a estirarse, sen moita profundidade nun principio, pero pouco despois da primeira hora Anxo Díez tivo que voar para sacar un centro chute de Jesús e o porteiro tamén enviou a córner pouco despois un libre directo de Josiño. O reloxo corría a favor dos ourensanistas e como queira que o seu rival tampouco era moi perigoso en fase ofensiva, nos minutos previos ao intermedio volveu aparecer Marquitos, que rematou por fóra da rede á saída dun córner e tamén se atopou con Rama, que volveu forzar outro saque desde a esquina.
Uns e outros confiaban nas súas forzas para a segunda metade, pero o certo é que os rojillos só tiñan certa profundidade cando atopaban a Marquitos desde o flanco zurdo, cun Champi outra vez incisivo. No bando contrario, aínda que lograban frear aos de casa en defensa, Otero foi unha auténtica illa na vangarda.
Currás moveu ficha con Tiago por diante de Durán e o canteirán Manu —que volveu lucir sobrio na medular—, buscando así mellores combinacións na liña de tres cuartos. Pero o experimento non funcionou, nin a entrada de Isi por un Marquitos que abandonou o partido tras un inocente cartón amarelo. Juan de Dora , Popi e Manu Eiroa eran as alternativas do Paiosaco, sen que tampouco mellorasen as súas prestacións ofensivas. De feito, o encontro converteuse nun peloteo insulso no medio campo, a pesar de que os visitantes debían lanzarse a por todas na recta final, ante a curta diferenza no tenteador.
Outro balón parado de Josiño fixo traballar a un Anxo seguro e unha acción persoal co selo de Champi non a aproveitou a porta baleira Hugo, recambio na punta do combinado local.
Os tres puntos souberon a gloria á UD Ourense, a só un triunfo do cuarto, o Arousa, ao que visitará a próxima fin de semana. Todo nun pano.
UD OURENSE (1): Anxo Díez, Gabi, Josu, Corzo, Alfredo, Manu Blanco , Rubén Durán, Rubén Arce (Tiago, min 62), Marquitos (Isi, min 67), Champi, Iago Blanco (Hugo García, min 80).
UD PAIOSACO (0): Rama, Bilal, Ventola, Beto, Pablo (Popi, min 71), Javi Fuentes , Jesús, Samu (Juan de Dora , min 62), Josiño, Aythami (Manu Eiroa, min 71) e Otero.
Goles: 1-0, min 4: Marquitos.
Árbitro: Lois Carro, do comité de Pontevedra. Amoestou a Marquitos, Tiago, Rubén Durán, Corzo, Alfredo; Samu, Ventola e Javi Fuentes .
Incidencias: O Couto. Preto do milleiro de persoas, con presentación dos xogadores da canteira local.