O Arenteiro cruzarase no camiño do líder Compos e a UD Ourense debe blindar O Couto
07 ene 2020 . Actualizado ás 05:00 h.Tras o empate do pasado domingo no Couto, tanto o Compos como o Ourense CF manteñen a carreira por un liderado que, na súa versión título de inverno ao final da primeira volta, dilucidarase con dúas citas de notable interese para continxente provincial.
Por unha banda, os santiagueses defenderán a súa primeira praza no Vero Boquete ante un Arenteiro que parece ir a máis e que chegará esporeado polo seu triunfo ante o Alondras. Os carballiñeses están a se afianzar na zona media da táboa e pretenden seguir mellorando un bloque no que están recuperando a súa retagarda habitual, ademais de integrar na medular a un xogador da talla de Pablo Lede e chegar a reunir a curto prazo a atacantes como Mitogo e Wadir.
Á expectativa estará o propio Ourense CF, que visitará en Calabagueiros ao Barco para un derbi de altos voos. Pese ao descoido de Redondela, forzado polas expulsións de Oviedo e Javi Rodríguez, os valdeorreses están en disposición de pechar a rolda inicial con 37 puntos e un partido pendente desde o temporal de decembro. Números de serio aspirante á promoción. Os de Fran Xusto presentaranse cun aval de 41 puntos, que inquieta ao mesmísimo Compos, por non falar da súa condición de máximo realizador do grupo e só trece goles encaixados en dezaoito partidos.
Polo que respecta á UD Ourense, o puxante Arzúa será o seu último rival da primeira volta no Couto. O descoido de Vilalba pechou a boa serie de resultados dos homes de Currás, pero cruzar o ecuador con 29 puntos sería unha opción de encarar a parte complementaria do torneo con aspiracións de seguir crecendo e con maior tranquilidade para os seus xogadores máis novos.