Javier Rodríguez Outomuro cumpriu 50 anos acompañado da súa familia nas bancadas do Couto
07 dic 2019 . Actualizado ás 05:00 h.Que o fútbol debería ser unha festa é unha máxima que ás veces se nos esquece. Si a lembraron os familiares de Javier Rodríguez Outomuro, un funcionario ao que o seu tío converteu en fiel seguidor do Club Deportivo Ourense desde os sete anos de idade: «Deixei de ir por estudos ou traballo nalgunha época, pero sempre fun seguidor do equipo e socio a maioría dos anos, ata a súa desaparición». E, por suposto, non dubidou en subirse ao novo proxecto da Unión Deportiva Ourense, así que desde a súa fundación foi abonado: «Síntoo como o meu equipo de sempre, aínda que sexa un novo club. É raro que me perda algún domingo, porque mesmo vou velos cando xogan como visitantes, pero o pasado domingo festexabamos o meu aniversario e pensei que non podería ir». Javier chegaba aos cincuenta e unha data tan redonda merécese unha celebración especial, así que reuniu á mesa aos seus familiares, que lle dedicaron un agasallo especial no último momento: «Eu non sabía nada, pero xa decidiran acompañarme todos ao fútbol. Incluso as mulleres, que non adoitan ir. Levámonos os globos e todos animamos ao equipo, que ademais correspondeu cunha vitoria. Foi unha tarde redonda, en familia e coa UD Ourense». Aí é nada, case medio século de xornadas balompédicas no Couto. Esta vez tocou sorrir e celebrar. ¡E que cumpras moitos máis, Javier!