Viaxes Low Cost colabora con creadoras de contido como Ana Politan, Marta Lozano ou Teresa Andrés Gonzalvo
03 novs 2019 . Actualizado ás 05:00 h.No 2010, o celanovés Benito Domínguez abriu as portas do seu propio negocio: Viaxes Low Cost. «Montei a miña propia axencia porque ese era a miña auténtica afección, tanto viaxar como organizar as viaxes. Quixen dedicarme profesionalmente ao que máis me gustaba», di. Unha vez posto en marcha decidiu sacarlle partido e dalo a coñecer aplicando outra das súas afeccións: a mercadotecnia dixital. E desta forma comezaron as colaboracións da axencia con influencers para fomentar a presenza da axencia ourensá en redes sociais.
Máis de oitocentos mil seguidores ten Marta Lozano e cincocentos mil acada Teresa Andrés Gonzalvo. As dúas son valencianas e son exemplos de creadoras de contido moi seguidas en España. As dúas estiveron en París e outros destinos da man de Viaxes Low Cost, algo que contaron a través das súas contas de Instagram. A priori trátase dunha simbiose, a axencia pon a viaxe e elas abren unha fiestra publicitaria contando a súa experiencia persoal de forma pública. Pero hai moito traballo detrás. «É importante escoller o tipo de seguidor ao que che queres dirixir, no noso caso buscabamos a xente de entre 25 e 35 anos, novos pero con independencia económica. Despois hai que pensar a que creadoras de contido segue ese público», explica Benito. O contacto con Marta e Teresa funcionou ben en canto a visitas á web. «Redirixiron cara á nosa páxina a unha chea de persoas, así que en canto a darnos a coñecer estivo xenial», admite. Outra das súas colaboradoras máis coñecidas é Ana Feijoo, AnaPolitan en Instagram. A influencer naceu en Nova York pero hai varios anos que se trasladou á cidade para casar precisamente con outro veciño de Celanova, onde ela tamén ten ascendencia. «Vinme por amor e aquí quedei. Son profesora a xornada completa pero por mor da miña lúa de mel en Bali e unha serie de casualidades acabei dedicándome tamén a crear contido en Instagram», di Ana. Por mor da proximidade naceu a colaboración con Viaxes Low Cost: «Coñecía a Benito de Celanova. Eu sempre prefiro axudar e facer contratos con alguén a quen coñezo ou que me toca de preto. Así que lle contactei e a el pareceulle boa idea». Desta forma, a creadora de contido galega viaxou a Sardeña este verán. «Ana sérvenos para xerar público ourensán e iso nótase moito», conta Benito.
O certo é que este celanovés afincado na cidade afirma que a empresa non lle vai mal. «Empecei eu só e agora xa somos catro persoas no equipo, algo que me fai moi feliz», di. Benito considera que o segredo da súa axencia está na especialización. «Estamos especializados en Asia. Temos contactos locais en todos os destinos do continente e iso nótase moitísimo á hora de pechar viaxes alí. O número uno segue sendo Tailandia aínda que nos últimos anos Xapón gañou moitos turistas», explica. Tamén conta que pouco queda xa do baixo prezo que deu nome ao local: «Empezamos facendo paquetes con aeroliñas low cost (baixo custo) cando non o facía ninguén, agora o que facemos é intentar levar iso a longo prazo distancia». Di que continuará dedicando orzamento ás colaboracións en redes sociais, entre elas ten pendente levar ao continente asiático a Ana Feijoo. Verémolo en Instagram.