O presidente popular proponse «levar aos mellores» e Villarino di que non tería sentido facer cambios agora
21 sep 2019 . Actualizado ás 19:46 h.A incapacidade para formar Goberno aboca aos españois a unhas novas eleccións xerais o próximo día 10 de novembro, pero esta situación non colleu por sorpresa aos principais partidos ourensáns. Todo apunta a que as candidaturas serán as mesmas que as presentadas na última cita coas urnas, celebradas o pasado mes de abril, pero non se descartan cambios.
O presidente provincial do Partido Popular, José Manuel Baltar, deixou a porta aberta a introducir modificacións nas listas da formación. Tras designar esta mesma semana ao comité de campaña -que é «o primeiro de España», destacou- nos próximos días reunirase o comité electoral, que é o encargado de facer unha primeira proposta de nomes. Esta farase, segundo dixo, «sempre pensando en levar aos mellores para que teñamos o maior apoio posible». O obxectivo é conseguir tres dos catro deputados en liza (en abril lograron dúas e o PSOE, outros dous).
O secretario provincial dos socialistas, Rafael Rodríguez Villarino, foi máis claro sobre o deseño das súas candidaturas e explicou que en principio non haberá cambios. «Tampouco tería moito sentido, cando non tiveron tempo aínda de desenvolver a súa labor, facer outro proceso», sinalou o líder da formación.
Sobre este asunto tamén se pronunciou este venres o secretario de Organización de Cidadáns en Galicia, Laureano Bermejo, que puido confirmar xa que a cabeza de lista do partido laranxa ao Congreso será de novo a profesora de Dereito Inés Iglesias Canle.