É a terceira provincia de Galicia en relación ao incremento de demanda hostaleira, cun 5,7 %
24 ago 2019 . Actualizado ás 10:44 h.Hai indicios de vida no turismo da provincia. Os últimos datos ofrecidos polo Instituto Nacional de Estatística (INE) sitúan a Ourense como a terceira de Galicia en relación ao incremento de demanda hostaleira durante o mes de xullo, cun 5,7 %. A media é superior, en seis décimas, á da Coruña, pero aínda afastada en comparación ás de Pontevedra e Lugo, que se situou á cabeza deste índice mensual autonómico cun 14,2 %.
Un total de 34.876 viaxeiros puxeron os seus pés na provincia no mes pasado, na súa maioría de procedencia nacional -concretamente, 30.924- e con 3.952 doutras nacionalidades. A cifra guinda un balance positivo se se atende ás do ano previo. En xullo do 2018 constatouse a chegada de 3.381 turistas menos. Curiosamente, tamén no mesmo mes do ano pasado cuantificouse unha estancia máis ampla de foráneos: 5.506 estranxeiros no 2018.
Con todo, o aumento de turistas faise extensible aos datos globais do ano 2019. Nos sete meses contabilizados, a provincia recibiu a un total de 191.303 viaxeiros, 6.232 máis que no mesmo período do 2018. Directores das principais cadeas hostaleiras da capital provincial resumían recentemente que, en certa forma, «Ourense converteuse nunha cidade lanzadeira» pola súa relativa proximidade cara a outros destinos de interese como Santiago de Compostela, a Ribeira Sacra ou os Canóns do Sil. Neste sentido, e a pesar de que as cifras de noitadas son similares ás do ano pasado, si se percibe un efecto chamada pola tempada estival.
Demanda na primavera e verán
No 2019, os meses de xullo, maio e abril reflicten unha alza da demanda para facer noite en hoteis, mentres que os meses de marzo, febreiro e xaneiro mostran unha caída en relación ao mesmo aspecto.
O maior número de noitadas no que vai de ano correspóndese ás 65.017 de xullo, pero o seguinte indicador está en abril, con 59.089. En xuño deste ano, por exemplo, reduciuse o número en 501, unha caída non moi destacada pero que nos sectores hostaleiros da cidade si percibiron. De aí a súa alegría polos datos de xullo. Ovidio Fernández, presidente da Federación de Hostalería de Ourense, pide que as boas sensacións do último mes non decaian: «Os números subiron, pero no seu momento dixen que debían facelo aínda máis».
Fernández móstrase un pouco sorprendido, porque, ao seu xuízo, «Ourense está afastada do que debería ser e todo o que se atrasa no noso turismo provincial están a aproveitalo outros cunha maior oferta», pero asume que as estatísticas son positivas.
Aínda así, pide que a análise para saber se se está tomando o rumbo correcto se base máis nas enquisas e sensacións que propiamente nos números. «Temos que seguir pensando como cumprir as cotas para os meses restantes, que hai que aproveitar», avisa. E alude ao turismo de excursións en contornas naturais como unha opción a explotar con máis énfase.
Doutra banda, os números ofrecidos pola Xunta de Galicia para o mes de xullo din que, no referente ao turismo interautonómico, Pontevedra segue sendo a que máis viaxeiros consegue atraer polos bos datos rexistrados nos destinos do litoral. Mentres tanto, A Coruña, Lugo e Ourense mantéñense por detrás.