Jácome ve unha «aberración» que tres sindicatos pidan unha titulación para ser alcalde
OURENSE
O alcalde asegura que non aceptará «imposicións»
21 ago 2019 . Actualizado ás 05:00 h.O escrito presentado por tres sindicatos con representación no Concello de Ourense (CSIF, CIG e UGT) no que criticaban as alusións do alcalde ás baixas médicas e aos salarios dos funcionarios municipais, ademais dos ataques por supostas «mafias» ou «enchufes», obtivo onte resposta por parte do rexedor. A través dun comunicado de prensa, o alcalde da capital cualificou de «clasista» e de «aberración» que tres «sindicalistas» pretendan fixar criterios par poder ser alcalde, con titulación específica, en referencia ao feito de que cualificaban de «triste» que o alcalde non tivese unha preparación mínima ou titulación académica. «So lles faltou engadir que sexan arios ourensáns, cun RH determinado e con capacidade de componenda (...) É unha grave agresión aos principios democráticos», indicou Jácome.
Especialmente crítico mostrouse o líder de Democracia Ourensá co portavoz da CIG no Concello, José Gago, a quen recomendou que repase «o currículo dalgúns dos seus compañeiros -en referencia a su cargo orgánico en el PSOE-, tanto agora como no pasado. El quere facer unha selección sectaria de persoas que reúnan os requisitos marcados para ser alcalde ou concelleiro con responsabilidade».
Gonzalo Jácome tamén se referiu á demanda que realizaban as tres forzas sindicais, entre a que se atopa a que obtivo unha maior representación nas últimas eleccións celebradas, para que se lanzase unha oferta de emprego, baseándose na relación de postos de traballo que se elaborou durante o mandato anterior e que segundo o rexedor levantou queixas por supostos «favoritismos». No comunicado remitido aos medios, o alcalde ourensán referiuse tamén ás baixas médicas sobre as que, dixo, só constatou «un dato» sobre que eran máis elevadas que na empresa privada. Ademais, advirte que aínda que non realizou ningunha consideración puntual se está «lexitimado para facelo».
Para concluír, Jácome quixo enviar unha mensaxe aos tres sindicatos e aos seus representantes que subscribiron o escrito crítico coa súa figura: «O principal obxectivo do alcalde, compartido polo goberno, é resolver os problemas dos cidadáns, pero sen imposicións dos representantes sindicais».