Ademais da capital, o PSOE gañou en todos os concellos de máis de 10.000 veciños
31 may 2019 . Actualizado ás 11:35 h.José Manuel Baltar quedou a menos de mil votos de reter a súa maioría absoluta na Deputación ourensá. Esta crise sen precedentes na gobernabilidade da institución provincial débese, basicamente, á perda de apoios do PP en zonas urbanas. O PSOE foi a forza máis votada na capital e tamén nos outros catro concellos máis poboados da provincia, é dicir, aqueles que teñen máis de 10.000 habitantes.
As eleccións do 26M non fan máis que confirmar unha tendencia que xa comezou no mandato 2015-2019. O PSOE xa tiña un dominio importante en contornas urbanas, coas alcaldías de Verín, O Carballiño, O Barco e Barbadás e a cita coas urnas do pasado domingo ha reforzado eses gobernos. Por outra banda, o PP gobernaba na cidade e en Xinzo, pero perdeu ambas as prazas.
Os populares cederon o primeiro posto entre as forzas máis votadas en Ourense e, aínda que o conservan na capital da Limia, non poderán gobernar porque se dá por feito un pacto de esquerdas e independentes encabezado pola socialista Elvira Lama. Algo similar podería ocorrer en Celanova. Alí o PP tamén foi a formación máis votada pero un pacto da candidatura Celanova Decide con PSOE e BNG podería forzar un cambio histórico na localidade.
Así as cousas, o municipio máis poboado que poderá gobernar o Partido Popular na provincia de Ourense é o de Pereiro de Aguiar, que conta con 6.254 veciños empadroados a 1 de xaneiro do ano 2018, segundo o Instituto Nacional de Estatística (INE). Alí a candidatura encabezada por Luis Menor conseguiu un 55,34 % de apoios. As seguinte localidade con maioría absoluta para os populares no ránking de municipios máis poboados é San Cibrao das Viñas, que ten 5.249 veciños. O 68,53 % dos electores apostaron pola lista popular que lideraba Manuel Pedro Fernández.
No top ten ourensán por número de habitantes hai, polo tanto, cinco municipios nos que o PSOE é a primeira forza e son, precisamente, os cinco que contan con maior poboación. Entre eles destacan a capital -porque os socialistas nunca lograran situarse nesa posición- e O Barco de Valdeorras, onde conseguiron máis da metade dos votos (un 54 %). Finalmente, cabe destacar que o de Allariz é o único concello dos dez con máis habitantes da provincia no que a primeira forza foi un partido distinto a PSOE e PP. Alí o BNG volveu ter maioría absoluta e, ademais, dunha forma moi folgada, cun 62,11 % dos votos depositados.
Apoio masivo nalgúns concellos, pero todos pequenos
En definitiva, a pesar de que os populares perderon nas zonas urbanas, ese partido foi o máis votado na provincia grazas ao amplo respaldo recibido nas localidades de menor tamaño. O PP superou o 70 % dos votos en trece concellos: Baltar, Beariz, A Bola, Cortegada, Cualedro, Esgos, Muíños, Oímbra, A Peroxa, Pontedeva, Quintela de Leirado, Sarreaus e A Veiga. Dáse a circunstancia de que todos eles teñen menos de 2.000 habitantes.